I&PR Conference Hall, Chanem-ah National Health Mission hnuaia Reproductive Child Health Prog. in hma a lak dan leh hmasawnna te thlir hovin hmalak zel dan tur nimin khan Dr. R. Lianmawia, CMO hovin sawiho a ni.
Dr. R. Lianmawia, CMO chuan hriselna hi ram leh hnam hmasawnna lungphum pawimawh ber te zinga mi a nih thu sawiin, Health Department chuan a mawhphurhna a hlen ngei ngei a ngai tih a sawi a. Healthcare programme hrang hrang-a hma an laknaah Health Department chu hnungtawlh lovin hma sawn zel chu a tih tur pawimawh ber a ni, a ti. Mipui vantlang hriselna tura hmalakna kawngah nu leh nau hriselna chu a pawimawh ber a nih thu sawiin, Mihring dam hun chhunga hriselna pan lai leh chakloh lai ber hun chu naupai lai leh nausen hun lai hi a nih avangin, ‘nu leh nausen te chu vulnerable group of society’ tih hial an nih thu a sawi a; ngaihven bik an ngaih thu leh an hriselna dinhmun that dan a zirin hriselna kawnga ram mipui hmasawnna pawh teh a nih thu a sawi bawk. CMO chuan thawktu indaihlohna tam tak awm mah se, a thawk mek te an tanrual thiam phawt chuan nasa takin hna an thawk thei tih hre reng chunga an awmna theuhah thawh hona tha zawka kalpui turin a chah a ni.
He hunah hian TR Lallawmthara, DDM; C. Lalramengi, DPM; Ngurliansanga, District TB/HIV Coordination; B Lalrambuatsaiha, District Programme Coordinator; Annie Lalhmingmawii, DVB Consultant leh Dr. Vanlalzarliani, SMO te chuan kalkhawmte zirtirna an pek bakah report an pe bawk.
Nimin NHM hnuaia nu leh nau hriselna tura sawrkar hmalakna pakhat, Reproductive Child Health(RCH) Programme in hma a lak dan leh hmasawnna te thlir hoah hian PHC hrang hranga thaktu : Ngopa, NE Khawdungsei, Mimbung, Rabung, Kawlkulh, Khawzawl, Biate, Sialhawk, Khawhai, Hnahlan, Bungzung, Farkawn, Khaw-bung leh UPHC, Champhai-a thawk te an tel a ni.
Comments are closed.