IN KANG TANPUINA PE

0

Get real time updates directly on you device, subscribe now.

Rabung khuaa khawsa mek Pu V. Lalhmingliana in luahlai, 19.11.2021 (Zirtawpni) chawhnu dar 2:00 vela kang tanpuina chu Inrinni khan State Disaster Response Fund (SDRF) kaltlangin pek a ni. Khawzawl DC aiawhin Pu H.Lalramenga, SDC & Nodal Officer, DM&R chuan SDRF atanga tanpuina pawisa fai Rs. 1,01,900/- (Cheng nuai khat sangkhat zakua) bakah silpaulin pahnih in kang tuartute kutah a hlan bakah, Rabung Village Council President Pu Vanlalrova Khiangte hnenah hnatlang thingpui lumna tur Rs. 2,000/- a hlan bawk.

Khawzawl District hmarlama awm Rabung khuaa Pu V. Lalhmingliana in hi Zirtawpni chawhnu dar 2:00 vel khan kang in, khawchhung mi tlawmngaiten theihtawp chhuaha an thelh chungin bungrua tlemte an chuh hman tih loh chu a kang chhe hman hle a ni. He inah hian Pu V. Lalhmingliana te nupa bakah an fa naupang pathumte an cheng a, kangmei chhuah lai hi pawnlama an awm lai tak a ni a, vanneihthlak takin mihring nunna chan leh hliam tuar an awm lo hlauh a ni.

He chhiatna thlen chungchang hi hriat a nih ve leh Pu C.C. Lalchhuangkima, Deputy Commissioner, Khawzawl District kaihhruainain hma lak nghal a ni a. Inrinni khan DM&R Nodal Officer hovin DC Office-a thawk thenkhatte Rabungah hian kalin in kang hi a hmunah an tlawh a. In kang tuartute tanpuina hlan zawhah hian hmalak zel dan tur sawiho a ni a. Rabung Village Council kaihhruaina hnuaiah hnatlanga in hi sak that tura rel niin, a sak dan tur leh hmalak zui dan tur kimchang chu Rabung VC kaihhruaina hnuaiah ruahmanna siam a ni dawn a ni.

Leave A Reply

This site uses Akismet to reduce spam. Learn how your comment data is processed.

This website uses cookies to improve your experience. We'll assume you're ok with this, but you can opt-out if you wish. Accept Read More