Champhai District Bawrhsap Maria CT Zuali chuan, thenawm ram atanga dan loa lo lut Kuhva chu India danin a phal rih loh avanga khap an nih thu leh, dan phal loh a nih bakah, Kuhva karah sawrkar phal loh thil lo zeh ruk a awm theih thin avanga lakluh khap a nih thu a sawi.
Nimin khan Nasha Mukt Bharat Campaign buatsaihin Peer Volunteer Training neiha khual lian niin he thu hi Bawrhsap chuan a sawi a. Mi felfai leh che felte chuan ngaihtheih loh an hlawh bakah, chu chuan nasa zawka hmasawnna tur kawng a dal thin tih sawiin, Kuhva rah chu mi harsa tam takin inhlawhna atan hmang mah se, rakzu leh beer-te a hmunah chhawp a nih thin avangin, chungah chuan hah taka an inhlawhna chu an tlak ral leh thin a, an chhungte tan hmasawnna hmuh tur a awm lo a ni, a ti a.
Naupang te te-in zirna hlamchhiaha an pan bawk avangin Kuhva rah chu hlawk tak leh thil tha angin lang mah se, kan ram hmalam hun tichhe thei a ni, a ti. Mihringte chu nawmsak duhnaa khat kan nih avangin a nghawng leh tur ngaihtuah hauh lovin thalai tam takte chuan ruihhlo an khawih phah thin tih sawiin; Champhai District chu ruihhlo rawn luhna a nih avangin ruihhlo hian min chenchilh a, hei vang hian ruihhlo hi kan khuaah hian a hluar zual phah a ni, a ti a.
Mizote chu thawk rim lem loa ei hmuh dan kan inzirtir nasat avangin, vawiin thlengin chu chuan thalaite nunah kawng tam takin a chhe lamin nghawng a nei a. Changkanna ringawt kan umna lamah ngawlvei an tam phah tih sawiin, kal khawmte chu an hmachhawn tur ruihhlo ngaite nungchang chu an hriat chian a ngaih thu leh, chhanchhuak tura theihtawp an chhuah a tul tih a sawi a. Sawichhiatna leh hmuhsitna karah beidawnna an la hmachhawn dawn tih hre chung a, ruihhlo bawiha tang mekte chhanchhuak tura mi inpe thahnem tak an awm chu lawmawm a tih thu sawiin, chhanchhuak vek thei lo mah se, mi pahnih khat lek an chhanchhuah pawhin an hlawhtling a ni tih inhre tura chahin, duhsakna a hlan a ni.
Peer Volunteer Training hi Kahrawt YMA Hall, Dawrkaikawn-ah hman niin, PB Liansangpuii, Member Secretary NMBC chuan a kaihhruai a. Zonunmawia, Counsellor, METAKHEN chuan Peer volunteer zinga mi 50 thlan chhuahte hnenah ruihhlo ngawl an vei dan leh a enkawl dan hrang hrang zirtirna a pe a ni.
Comments are closed.