INDIA ZALENNA LAWM DAN TUR REL

Get real time updates directly on you device, subscribe now.

Nimin chawhma dar 11:00 khan Champhai DC Conference Hall-ah India ram zalenna ni, August ni 15 a lo thleng tur lawm dan tur relin District Level Independence Day Celebration Committee chu an Chairman District Bawrhsap Pu James Lalrinchhana hovin an thukhawm.
He hun kaihruaitu Bawrhsap Pu James Lalrinchhana chuan Independence Day lawmna chu District anga hmellanna tur a nih thu sawiin, a lawm dan tur pawh kan zavaia that tlanna tur leh mipui hmakhua ngaihven chung zela rel a tul a ni, a ti a. Hrileng leh tul dangte ngaihtuahnaa dah chunga hmalak a tul thu sawiin, mawhphurhna nei hrang hrang leh chanvo nei tura ruatte chu Independence Day hlawhtling taka lawm a nih theih nana thahnemngai taka thawk theuh turin a chah a. Zalenna hlutzia leh hmasawn tura hman thiam a pawimawh thu pawh sawiin, District mipuite chu zalenna pawimawh zia hre thara Independence Day hman tur chu inhrilhhriatna leh inzirtharna atana hman tum theuh turin a chah a ni.
Thukhawm chuan India ramin zalenna a neih ni August ni 15 chu India ram ni bik leh pawimawh tak a nih avangin hrileng laka himna tura inkaihhruainate tha taka zawm chungin a lawmna buatsaih tha a ti a. Zing dar 6 ah sawrkar pisa leh zirna in-ahte hnam puanzar pawhpharhin, zing dar 10 atangin Chhangphut Field-ah Independence Day lawmna ropui taka neih nise a ti a. Kumin Independence Day lawmnaah hian parade contingent leh pipe band-te tel thei turin meeting chuan a beisei a. Parade contingent-te inzirlawkna chu August ni 8 atanga tana final rehearsal August ni 12 a neih nise tih a ni a. Sawrkar department hrang hrangte hna chanpualte siamfel nghal niin, Independence Day ropui taka lawm a nih theih nan mahni chanvo theuh hneh taka hlen turin meeting chuan mawhphurhna latu zawng zawngte a ngen a ni.
He hunah hian Department hrang hrangte thawhlawm pek tur zat bithliah niin, Celebration Committee chuan phal taka tawiawm theuh turin a ngen a. Kumin Independence Day puala infiamna neih tur senso chu sum tlingkhawm leh hman dan tur azira bithliah mai nise tih a ni a. Independence Day lawmnaah hian thiamna leh eizawnna lam kawnga hlawhtlinna chang chawimawi tlak ni a hriatte chawimawina hlan an nin theih nan a tul anga hmalak nise tih a ni bawk.
Tun dinhmunah kumin Independence Day lawmna Champhaia hmanpuitu tur tihchian a la nih rih loh thu meeting-ah hian tarlan a ni a. Thukhawm chuan Independence Day chu India ram ni pawimawh bik a nih avangin sawrkar hnathawk, zirlai leh khawtlang mipuite chu he hun hi ngaipawimawha tel vek turin a sawm a ni.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More