Mizoram Sawrkarin Karleh Thawhtanni zing thleng inkharkhip a puan chhunzawma Champhai District chhunga inkaihhruaina dan hman tur chu nimin khan District Disaster Management Authority chuan a duang fel.
Nimin khan District Disaster Management Authority chu an Chairman, Maria CT Zuali hovin DC Conference Hall-ah an thukhawm a, Champhai District chhunga inkharkhip kalpui chhunzawm tura inkaihhruaina tur an duang a. Inkaihhruaina hman mek zinga dawr hawn phal lohte chu an inhawn theih hun tur ruahmansak an ni a. Insakna, Mistiri bungrua, Agriculture leh ran chaw zawrhna dawr te Thawhtanni leh Ningani zing 6:00 atanga Dar 10:00 inkarah an in hawng thei ang a.
Eichawp, Thlai, Chawhmeh, Sa, Stationery leh Zirlai bu zawrhna dawrte Thawhlehni leh Zirtawpni zing 6:00 atanga Dar 10:00 inkarah an in hawng thei ang. Heng bak dawr dangte chu Nilaini leh Inrinni zing 6:00 atanga Dar 10:00 inkarah an in hawng thei ang.
Thawhtanni leh Ningani zing dar 5:00 atanga zing dar 9:00 inkarah distributor/wholesaler ten retailer (zuar chhawng turte) hnenah an bungrua an sem thei ang. Retailer-te hian an veng VLTF-te remtihna an neih vek a ngai thung dawn a.
Hmasawnna hnathawh chungchangah, mahni in leh compound chhungah hnathawktu rawih phal a ni a, hnathawhna hmuna VLTF leh hnathawktu awmna veng VLTF remtihna nen hnathawktu veng dang rawih phal a ni tawh ang a. Hmun khatah mi 5 aia tamin hna thawh loh tur a ni ang.
Leilet, huan, sangha dil leh a dangte-a lehlanga thawk turte chu zing dar 9:00 ah an chhuak hman vek tur a ni a, zan curfew (dar 7:00) hma-in an let leh hman tur a ni a. VLTF ten an kalna hmun tur leh permit pek chhan te, hnathawk tur zat chiang takin permit-ah an ziak tur a ni. Leilet, huan, sangha dila hnathawk turte hian duty-te enfiah theih turin leilet/huan/dil an nei ngei a ni tih finfiah theihna document (LSC, Periodic Patta, VC Pass, VC hriatpuina lehkha) an keng tel ngei tur a ni.
Bungraw phur lut tur lirtheite chuan Curfew intan hma, zan dar 7:00 pelh hmain Khankawn Police Checkgate an paltlang hman tur a ni a, zan dar 7:00-a Khankawn Checkgate thleng hman lote chuan khaw daiah an nghah a ngai ang. Zan dar 7:00-a Khankawn Checkgate pel hmante chu zan dar 6:00 atanga zan dar 10:00 thleng an bungrua thiar/hlan thlak phalsak an ni ang. Bungrua an hlan thlak zawh veleh an haw leh nghal tur a ni.
Bungraw neitu/chahtu te hian an bungrua a lo thlen hmain an bungraw chah chungchang VLTF-te hnenah an lo hriattir lawk tur a ni a, bungraw thiar tur (Mutia) veng dang atanga chhawr a ngai a nih pawhin an awmna veng VLTF hriatpuina an lo la lawk vek tur a ni ang.
Zin veivah chungchangah mahni khaw pela zin phal loh chhunzawm a ni a, damlohna leh chhiat tawh chungchangah VLTF rem tihnain zin chhuah phal a ni a. Heng bakah hian loh theih loh thila zin tulnaah chuan Deputy Commissioner/SDO/BDO ten phalna an pe thei ang.
Sawrkar Pisa kai chungchangah Head of Office te’n kal tur an ruat te chauh
kal tur a ni a, midang zawng chu Executive duty atan ruat chhunzawm leh tur an ni ang.
Comments are closed.