Mizoram Sawrkar chuan Covid- 19 a darh zel loh nana inkaihhruaina a siam thenkhat tidanglamin thla thar, March ni 1 atangin Middle School (pawl 5 atanga pawl 8) zirlaiten School leh Hostel an lut thei tawh dawn.
Nimina sorkarin inkaihhruaina dan thar a tih chhuahah chuan District Headquarters-ah te chuan zan dar 10 leh zing dar 4 inkarah pâwn chhuah khap a ni a. Hemi atan hian District Magistrate ten thupek an chhuah ang.
Thla thar, March ni 1 atanga School leh Hostel-a lut tur Middle School zirlaite chu ‘Thermal Screening’ hmanga lo endik vek tur an ni a. Hostel-a lut tur reng reng chuan RT-PCR/TruNAT test/RAgT Negative Certificate, Hostel an luh hma darkar 96 aia rei lova lak, an nei ngei tur a ni. School Education Department-in ruahmanna leh inkaihhruaina a siamte uluk taka zawm tur a ni. District Headquarters-a dawr, Hotel, Restaurant leh sumdawnna hmun dangte chu zan curfew tan hun bawh buai lo tawka hawn theih a ni ang a. Hotel leh Restaurant-ah te hian inkaihhruaina hman tur chu Tourism Department-in a duang ang a, khauh taka zawm tur a ni ang. Damdawi dawr leh Petrol Pump te erawh chu khuahkhirhna awm lovin an inhawng thei ang. Curfew-in a huam lohna khuaa dawr, Hotel, Restaurant leh sumdawnna hmunte hawn chungchangah inkuahkhirhna a awm tawh lo vang.
Aizawl Municipal Corporation huam chhunga lirthei intlanchhawk dan chu Superintendent of Traffic, Aizawlin ruahmanna a siam ang zela kalpui zui tur a ni.
Comments are closed.