𝗜𝗻𝗸𝗵𝗮𝗿𝗸𝗵𝗶𝗽 𝗶𝗻𝗸𝗮𝗶𝗵𝗵𝗿𝘂𝗮𝗶𝗻𝗮 𝗖𝗵𝗮𝗺𝗽𝗵𝗮𝗶 𝗮 𝗵𝗺𝗮𝗻 𝘁𝘂𝗿

Inrinni khan District Level Task Force on Covid-19, Champhai District chu DC Conference Hall-ah an thukhawm a, hripui leng vanga inkhuahkhirhna kalpui mek thlirletin, tun thla chhunga Inkharkhipna kalpui zui tur chungchang an Chairman Maria C.T Zuali, District Bawrhsap kaihhruaiin ngaihtuah a ni.
Champhai District chhungah khawtlang hmalakna kaltlanga Covid-19 hrikai, natna langchhuaklo leh ngaihtuah awm lutuk lote enkawlna tur Community Covid Care Centre (4C) din a tul thulha hmalak nghal mai theih tura ruahmanna siam chungchangte sawiho a ni a. 4C chungchanga hriattur tulte CMO Champhai Dr R.Lianmawia’n a sawifiah a, VLTF te chu Mizoram pawn atanga lo haw, an bial chhunga  mi khung hrante enzui thin tur leh, CMO Office lama hriattir zel thin turin a chah a ni.
He thutkhawmah hian chawhmeh, thlai leh theite rualkhai taka sem leh, buaipui tham thlai leh thei tharte tana ruahmanna siam dan tur, Vegetable Supply Chain chungchang pawh ngaihtuahin, Nodal Officer atan DHO
Champhai B.Lalzarzova chu a ruat a. Champhai District paltlanga raltlan haw thin chungchang pawh ngaihtuah niin, hri laka him tlan nan leh ramri kaltlanga dan lova thil tih awm palh thei ven nan ruahmanna siam a ni bawk.
Mizoram sawrkarin tukin atanga tun thla ni 31 zing dar 4:00 thleng Inkharkhip pumhlum (Total Lockdown) kalpui chhunzawmna tur
thupek a chhuah a. He thupek hi Champhai district-ah pawh hman ve nghal tur a ni a. Mizoram sawrkarin thupek a chhuah zingah Champhai khawpui chhunga hman tur siam danglam hret a ni.
Dawr leh chawhmeh zawrhna chungchang :
Mipuiin mamawh zualpui an lamkhawm theih nan leh tawt lutuka an bazar loh nan hetiang hian ruahmanna siam a ni –
1) Thawhtanni leh Ningani zing dar 6:00 atanga chawhma dar 10:00 inkarah In sakna leh Mistiri bungraw zawrhna, Agriculture lam kaihhnawih zawrhna dawr hawn theih a ni ang.
2) Thawhlehni leh Zirtawpni zing dar 6:00 atanga chawhma dar 10:00 inkarah eichawp dawr, thlai, chawhmeh leh sa zawrhna dawr, Stationery item/Zirlaibu dawrte hawn
theih a ni ang.
3) Bungraw phur lirthei leh Official duty lirthei mamawh, oil leh spare part zawrhna dawr leh Workshop-te chu emergency mamawh atan VLTF hriatpuiin hawn chawp theih a ni ang.
4) VLTF ten tawt lutuk leh mipui inhnaih lutuka an bazar loh nan ruahmanna an siam ang.
5) Bazara mamawh leia chhuak turte chuan VLTF Permit an nei ngei ngei tur a ni.
6) A chunga tarlan bak dawr dang zawng, Damdawi dawr tiam loin, hawn phal a ni lo ang a, a chunga sawi bak, ni dang zawngah dawr khar tur a ni bawk ang.
7) Champhai khawpui pawn lam atanga Champhaia bazar turte chuan dawr hawn hun chhungin bazar hman turin ruahmanna an insiam tur a ni.
Hmasawnna hnathawh chungchang :
1) Mahni in leh compound chhungah veng chhung mi hnathawktu ruaiin hna thawh phal a ni a, hmun dang atanga hnathawk (labour) rawih phal a ni lo. Hmun khatah mi 5 aia tamin hna thawh loh tur a ni.
2) Chhiatrupna thleng palh thei chi hnathaqwh hmanhmawhthlak a awm a nih chuan DC leh a aiawh ten a hmunah VLTF te nen enfiahin, a tul an tih chuan, hnathawh phalna pek theih a ni ang.
3) Hmasawnna hnathawh hrang hrang – Quarry-a lung lak, kawng laih, lei dawh, tui lak leh a dangte bakah, leilet leh huana hnatahwh tul zual bik, thlai chi thlak leh buh tuh tur, ran vulhte leh sangha dil neitute chu an hna thawh phalsak an ni ang a, ram an riah pawh phal a ni.
Lehlanga hnathawk turte chu zing dar 9:00 ah an chhuak hman vek tur a ni a, tlai dar 5:00 hmain an let leh hman tur a ni. VLTF ten an kalna hmun tur leh permit pek chhan te, hnathawk tur zat te chiang takin an Permit-ah an ziak lang tur a ni.
4) Leilet, huan, sangha dila hna thawk turte chuan leilet/huan/dil an nei ngei tur a ni tih lantirna lehkha pawimawh – LSC, Periodic Patta, VC Pass, VC hriatpuina lehkha, duty te enfiah theih turin an keng tel ngei tur a ni.
5) Mahni ina thil siam – Carpentry workshop, steel fabrication workshop, bakery, puan thuina, puan tahna leh hetiang lam thil thawhna hmunahte chuan a awm chilhtu, hnathawktute tan VLTF hriatpuiin hna thawh phal a ni a; mahse, pawn lam mi chhawr phal a ni lo ang.