Chin State Burma Sipai leh CDF te inbeihna buaina kal zelah mahni sahimna zawnga Mizoram lut an la awm belh mek zel.
Tuipuiral Group YMA huam chhungah raltlan an pung zel a, raltlan hmasa hi 1441 la awmin, lo lut thar hi 896 an awm bawk a, Tuipuiral huam chhungah hian an vaiin 2347 an awm mek a. Heng raltlangte tan hian an chen lailawkna tur hmun a awm loh avangin Bialtu MLA tanpuina leh mi inphal NGO, Kohhran leh mimal te tanpuina nen relief camp leh Quarantine Center sak chhunzawm zel a ni a.
Zawlsei, Farkawn, Vaphai, Khuangthing, Dungtlang, Thekte, Thekpui, Leithum, Sesih, Sazep, Khuangleng leh Vanzau ah te sak a ni a. Mi 730 awm theihna turin khaw 8-ah te hian sak zawh tawh niin, Khaw 4-ah la sak mek a ni. East Tuipui Bialtu MLA Ramthanmawia silpoulin pek hmangin a chung zar a ni.
Heng bakah hian, Tuipuiral khaw tinte raltlan mikhual turin an inbuatsaih mek zel a. Khaw thenkhatte chuan an khaw raltlante tan mutbu, bungbel, Thing tuah, thawmhnaw leh buhfai te an thawhkhawm bawk a ni.
YMA Sub-Headquarters Champhai chuan nimin khan raltlan buk zualna khaw 5 – Vaphai, Farkawn, Khankawn, Thekpui leh Thekte-ahte ei tur chi hrang hrang leh sum fai an pe a ni.
Hetih lai hian Inrinni tlai dar 3:00 bawr vel khan Myanmar Sipai te’n Thantlang khaw chhung hmun lun laia mipui chenna in leh dawr eng emaw zat chu silai leh bomb hmangin an suasam a. Chenna in bik hi 19 a kang ral nia thu dawn a ni. Myanmar Sipai-te hi in chhung leh dawr chhungah te lutin, an thil hlu neih ang ang leh dawr bungrua an la fai vek bawk a ni. In leh dawr an suasamna hmuna mipuite chu insasengin him mah se, In kang thelh tura kal Thantlan Thalai hruaitu pastor Chung Biak Hum chu Myanmar sipaiin sawisain an inneih zungbun laksak turin a kut zungtang pakhat an tan sak a, a hnuah an kap hlum zui ta tho niin sawi a ni. CDF te hian Sipai lam hi bei zuiin mi 30 vel an kap hlum nia
thu dawn a ni bawk.
Comments are closed.