Champhai-ah COVID-19 hri kai hmuh belh zel niin, Inrinni khan hri kai mi 2 hmuh chhuah belh leh an ni.
Champhai CMO Dr. R. Lianmawia hnen atanga thu dawn danin Inrinni-a hri kai hmuh chhuah tharte hi Venglai-a mi niin, nufa an ni a; a fanu zawk hi hostel-a a lut tur, hri a kai leh kai loh endiknaa hri a kai tih hmuh chhuah a ni a; hei vang hian a nu pawh endik ve nghal niin, a nu pawh hian hri a kai tih hmuh chhuah a ni leh ta a ni.
A nu hi kum 45 mi a ni a, a fanu hi kum 15 mi, pawl 9 zirlai a ni. Inrinni-a hri kai hmuh chhuah chenpuite pawh an sample endik ve nghal niin, hri an kai ve lo hlauh thung a, ni 7 chhung tal inkhung hrang tura tih an ni.
Heti hian Champhai District-ah hri kai mi 99 an awm tawh a; hri kai enkawl lai hi mi 5 awm mekin, mi 94 enkawl dam an ni tawh a ni.
CMO chuan, Positive Contact nei reng rengte chu ni 7 chhung tal inkhung hran tur a ni a, chumi hnuah chuan sample endik thin tur a ni tih hre thar leh turin mipui a chah nawn leh a; a tul angin hnuchhui pawh an tih mek zel thu a sawi bawk.
Comments are closed.