INTODELH TURA TAN LAK TUL TI

Get real time updates directly on you device, subscribe now.

Nimina Lead Bank Office Champhai buatsaihin Bank kaltlanga sawrkar laipui scheme hrang hranga hamthatna loan leh credit scheme dang awm theite inzirtirna hun, Champhai Kahrawt YMA Hall-a buatsaihah hei hi Credit Outreach Program Chairperson Maria CT Zuali, District Bawrhsap chuan a sawi a. Thla thum danah Bank leh Line Department hotute nen inrawnkhawmna neiin, loneitu te, sumdawng leh zirlaite tana hamthatna scheme hrang hrang awmte leh hmalak dante thlirho thin a nih thu a sawi a.
Hamthatna awm angte dawng thei turin kan tana sawrkarin scheme a duante kan hriat bel a tul a. Loan lak leh credit scheme chhawr tangkai theih dan leh bawhzui dan tur, Lead
Bank Office leh NABARD te thahnemngaihnaa buatsaih a ni chu lawmawm a tih thu a sawi.
Ram dang atanga ei leh in, nitin mamawh leh hmanraw eng emaw zat lakluh thin tih tlem a nih theih nan tualchhung thar leh dehchhuah tihhmasawna intodelh tura tanlak a tul a. Thil inthlak danglam ang zela inher rem zung zung thiam, taimakna leh rinawmna neia dingchhuak thei tura hnathawh a tul tih sawiin, ram dang atanga mamawh zawng zawng lakluh lo va, mahni kut kea dinga District intodelh ni thei turin rilru puthmang kan thlak a tul, a ti a. Ei leh in sawngbawl kawngah tun aia hmasawn tura tanlak mek a nih thu sawiin, food processing training neih thuai tum a ni, a ti. Kalkhawmte chu tumruhna leh huaisenna, beih hram hramna nun nei theuh turin a fuih bawk.
He hunah hian Line Department hotu te, Bank hrang hranga thawk te, zirlai te, Kahrawt veng VC member leh YMA hruaitute an tel a. Credit Outreach Program buatsaih hi Jyoti Munna Soren, LDM & Convener, Lead Bank Office Champhai chuan a kaihruai a. H. Lalhmachhuani, DDM, NABARD Champhai leh Rozamliana, Branch Manager, Mizoram Co-operative Apex Bank Champhai ten sawrkar laipui scheme pawimawh tak tak te, Bank kaltlanga loan lak dante an sawi a. Agriculture infrastructure fund NABARD Scheme, CLSS, PMEGP, Education Loan, Mudra Loan, HFA, KCC Loan, Stand up India leh Scheme pawimawh dangte zirho a ni bawk.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More