Thla 7 zet chhunga Champhaia Sawrkar Office hrang hrang tum 10 lai rawktu zinga a bultumtu bera puh chu nimin zing dar 2:30 khan Champhai Police-te’n an man.
James Vanlalthlana, kum 42, s/o Sanglura, Jacob Vanlalbika tia insawi thin, tuna Khawmawi Myanmar-a cheng mek nia insawi hian nizan hmasa khan District Agriculture Office-a rawk a, Thir Thingrem (Iron Chest) a ruk chhuah, Myanmar Bike Kenbo-125 hmanga a phurh lai nen nimin zing dar 2:30 khan Champhai Police-te hian New Champhaiah an lo man a. Agriculture Office atanga Thir Thingrem a lakchhuahah hian Rs 4,64,950 awmin, Champhai Police ten an hmu let leh nghal a ni.
Champhai Police-te sawi danin, James Vanlalthlana hian, Nikum October ni 19 khan Agriculture Office hi lo rawk tawhin Rs. 5,50,000 a lo ru chhuak tawh bawk a. Nikum October thla atanga nizan hmasa thleng khan
Champhai khawpui chhunga Office hrang hrang 10 a rawk hman a. Champhai Police te’n ngawrh taka an chhui zui hnuin nimin zing khan an man ta a ni.
James Vanlalthlana hian Revenue Office rawkin Computer set Rs. Sing 8 man a ru chhuak a. DRDA Office tum 2 rawkin Rs. 26,150 leh Petrol Litre 70 Coupon a ru chhuak a. District Court atangin Computer Desktop Rs. Sing 4 man, EE P&E Office atangin Gas Cylinder leh CPU, DLAO Office atangin Rs. 25,000; BDO Office atangin Rs. 50,000 leh Govt Champhai College atangin Rs. 1,55,500 hu Computer a ru chhuak bawk a. Kum 2018 khan SE P&E Office rawkin, Kum 2019 ah ICDS Office a lo rawk tawh bawk.
Champhai Police-te chuan Sawrkar Office rawk thin a nih avangin nikum October thla atangin Special Team dinin, hnu an chhui tawh tih an sawi a. Nizan hmasaa Agriculture Office rawk tur hian James Vanlalthlana hi
Myanmar Khawmawi atangin zan dar 11:00 velah rawn chhuakin, Farlui kai atanga ramri rawn kanin Champhai a rawn lut a. James Vanlalthlana hian tun hma lama Serchhipa Sawrkar Office a rawk tum pawhin, Lunglei atang daihin Serchip hi a lo pan tawh a. Hmun hla tak tak atangin Office te hi rawka, a tlanbo leh daih zel avangin man lawk theih a ni lo tih an sawi bawk.
Champhai Police te sawi danin James Vanlalthlana’n Sawrkar Office 10 a rawk atanga pawisa a ruk chhuah leh bungrua a ruk chhuah hlut zawng hi Rs. 14,31,400 a tling a. James Vanlalthlana hi District dangah tun hma lamin ruk ruk avangin tum 4 Lung Inah khung a lo ni tawh bawk.
Comments are closed.