A bial chhunga hun hmang mek Health & Family Welfare Board Vice Chairman Dr. ZR Thiamsanga chuan nakkum January thla chhoah Covid-19 Vaccine neih hman beisei a ni, a ti.
Nimina Champhai DC Conference Hall-a Champhai khawpui thianghlim, mawi leh hrisel siam tura hmalatu Clean, Beautiful and Healthy Champhai Town Committee thutkhawmah Adviser Dr. ZR
Thiamsanga MLA, Health & Family Welfare Board Vice Chairman chuan he thu hi a sawi a. Clean, Beautiful and Healthy Champhai Town chu Champhai Master Plan puahchah mek nena kalkawp
tur niin, Champhai North leh Champhai South bial vawngtu MLA te inthuruala thahnemngai taka kalpui mek zel a ni a, kan zavaia tangrualin Champhai thar siam kan tum dawn a ni, a ti a. Faina, hriselna leh
mawina kawnga District level hmalak tawhna hrang hrangah Champhai khawpui bialtu MLA pahnihte thinlung takin an lawm tih a sawi a.
Kum tharah sawrkarin khaw hrisel ber lawmman siam a tum tih sawiin, BSc Nursing thutchilh Health and
Wellness Centre eng emaw zat siam a nih thu leh Sub Centre awm lohna khuaah Health Clinic buatsaih a, Health Worker-te dah a ni chuan Covid-19 hri leng karah hriselna kawnga hmasawn nan theihtawp chhuah chhunzawm reng a ni tih a tarlang a ni, a ti.
Nakkum January thla chhoah Covid-19 Vaccine pawh neih hman beisei a nih tih sawiin, vaccine dawng
hmasa turte thehlut tura tih an nih tawh thu leh Covid-19 dona kawnga ral hmatawnga dingte ngaipawihmawh hmasak an nih tur thu a sawi a. Krismas leh Kumthar lo thleng turah mipui te fimkhur lehzual tura chahin, puipunna leh a huhova hun hman ang chite siam lo turin a chah a. Champhai
khawpui thianghlim, mawi leh hrisel siam tura theihtawp chhuahpuiah Champhai mipui a sawm bawk a ni.
Thukhawm hian Champhai khawpui chhung mawi leh en hahdam siam turin rualkhai zawka rawng hman tha a ti a. Rawng hman tlanglawn ber ni turin rawng var thlan a ni a, rawng dangte nena hman pawlh pawh phal ni se, inchung atan bik erawh rawng sen leh hringte hman ni se, tiin an rel.
Comments are closed.