Kan Chanchin

 A Tobul : A hmasain Vengthlang Branch YMA lo indin chhoh dan han tarlang hmasa ila. Mizorama YLA a din atanga kum 6 hnuah chuan Chawnchhim khaw pumpui thalaite chu September 2, 1941 khan Kahrawt Biak Inah YLA hi din ve a tha an tih leh tih loh sawikhawm turin an kalkhawm a. Din ve ngei tha an ti a, inthlanna te neiin an din ve ta a. Heta hruaitu an thlan chhuahte chauh hi chu han tarlang ila (an ziak ang angin):

                  President                   : Dr Hrangbuanga
                  Vice President          : Kapchhingvunga CI
                  Secretary                  : Saihranga 
                  Assistant Secretary : Ztu Lianvela, Nl Lalthansangi  
                  Treasurer                 : Kaptea (Compounder)
                  Financial Secretary : Lalthankima

            Veng tinah mipa 2 leh hmeichhia 2 member khawn khawm tur an inruat a. Member pawh 137 lai an ni nghal a. Kum 5 chhung zet hetiang hian Branch pakhatah Chawnchhim YLA chu an awm hnuin remchang zawka an hriat avangin Ni 13.10.1946 khan Branch pathum, Vengsang, Kahrawt leh Vengthlangah inthenin Chawnchhim YLA erawhchu Central YLA tiin a la ding ve zel thova, tuna Joint YMA kan tih tak hi a ni.

            Vengthlang Branch YMA chuan bul an han tan ta a. Kal lo kalphung tawh leh kan kal mek dan athen a zar chauh han tarlang tun ila. An Committee Minute, ziaka hmuh theih hmasaber chauh chu an ziak dan ang angin han tarlang hram ila. 

“ Ni 2.Nov 1947 ni a YMA Committee thurelte,
 Tahrik 4. Nov 1947 zanah Vengthlang Branch zawng zawng chu inthlanthat a hun tawh avangin inkhawmna awmse kan ti.
                    A hmun    : President Kapa Inah a ni ang.
                    Tantu        : Biakliana V.T, Bible chhiarin a tawngtai ang.
                    Chairman : Lianbawia
 Member zawng zawngin a fee ken theuh tur. Thanga`n Tlangau Bu a chhiar ang.”

              Vengthlang Branch pawisa neih ziaka lang hmasaber chu December 22, 1947 khan Cheng 17, a hnah 1, pawisa 3 an nei a ni. Mizoram Independence Movement laia tlema YMA anga thiltih a harsat deuh lai tih loh chu chak loh leh dul lai pawh nei hauh lovin an kal chho zel a. Rambuai zual a reh khan Vengthlangah hian mihring pawh kan lo pung ta a ni ang, thiltih a awlsam zawka, kan chak zawkna a nih beiseiin ni 19.8.1971 khan Group (tuna Section kan tih ang hi) 5 ah inthenin, chung Group 5 ah chuan Leader ruatin Office Bearers dang an lo inthlan pawh an remtihsak bawk a. Chung Section Leader an ruat hmasaber hming chauh chu han tarlang leh ila ; Group A ah Pu Darkhuma, Group B ah Pu Vanbawiha, Group C ah Pu Laltlanthanga, Group D ah Pu Chalzika, Group E ah Pu L Georgethanga te a ni a. A hnu deuhvah Group 5 te chu sawikhawmin Group 3, A, B leh C ah te then an ni leh a. Ni 4.2.1982 atang khan tuna kan Section hming, Khuangchera, Neuva, Taitesena, Vanapa leh Chawngbawla Section tiin a hming an lo vuah ta a ni.

            Khua a thang zel angin Vengthlang pawh kan lo thahnem ta hle a, Section thenkhat te chuan indan an dil ta hlawm a. February 1, 1983 khan tuna Bethel Branch hi an indang a. January 5, 1988 khan tuna Venglai Branch hi an indang leh a. February 10, 1989 khan New Champhai Branch hi an indang a. March 15, 1991 khan tuna Electric Branch hi an indang leh a ni.

 Buildings :

           Vengthlang Branch YMA hian YMA Office atan leh Committee Room atan Concrete Buiding tha tak mai veng laili tak maiah YMA Run a nei a. He YMA Run sak nan hian member ten theihtawp chhuahin inhlawhna chi hrang hrang nen,lucky ticket, talent contest leh thildang dangte huaihawtin, sum tuak nan an tha leh zung an lo seng thin a. Tichuan, he Run tha tak mai hi June 15, 1992 khan, Pu Vaivenga, chutih laia Mizoram Health Minister chuan ropui takin a hawng a ni.

             Tin, mi harsa zualte chenna atan Runmawi chu a sa bawk a. Ni 8.4.2000 a Pu HS Vanlalfakzuala, khatih laia VCP, Champhai VC II in luah theiha a hawn a. Tin, bungraw dahna in tha tak College Road sirah neiin, bungraw enkawltute chenna atan chung luah theiha siam a ni a. Tin, Thlanmual Godown tha tak mai Pu DK Laihnuna hriatrenga nan Pi VL Hmuchhuaki te chhungkaw min sak sak kan nei bawk.

 Branch Kalphung : 

            Vengthlang Branch YMA hi tunhma atang tawhin Kohhrante nen an thawh hona a tha thin hle tih an minute lo ziak tawh atangin a lang thei a. Tin, khawtlang inrelbawlna lam a thawk VC te nen pawh thawh hona tha tak kan nei reng thin a ni. 

             Vengthlang Branch YMA hian tunhma atang tawhin khawtlang inrelbawlna leh nunphung tha a inkaihhruaina mai bakah Zirna hi a ngaipawimawh hle a. Champhai a High Sikul hmasa, GM High Sikul sakna atan hian vawi duai lo inhlawhin, theih tawp an lo chhuah tawh thin a. Ni 7.1.1959 khan Vengthlang atanga College kal, chawlh hmanga lo haw lawmna hun an lo hmang hian zirna an ngaipawimawh thin hle a ni tih a tilang chiang hle. Tin, zirlai tithate chawimawina hun hi vawi engemawzat buatsaih a ni tawh bawk.

             Branch-in bungraw hrang hrang kan neihte enkawla atul apiang lo thawk turin Property Sub-Committee din a ni thin a. He Sub-Committee hian atul angin hma an la mai thin.

           Vengthlang Branch YMA hian vengchhung inhriatpawhna hi a ngai pawimawh hle a. Ni 23.12.1947 khan vengchhung chanchin chhuah hi an lo rel daih tawh a. Ni 12.10.1991 atanga chhuah tanin Taitesena Section chuan Vengthlang Branch YMA Chanchinbu YMA Palai chu an chhuah tan a. Harsatna eng engemaw avangin ni 28.4.1992 atang khan Branch in a enkawl ta a. Editorial Board member hmasaberte chu Pu R Rosiamliana, Pu C Lalremliana, Pu Lalhmangaiha Khiangte, Pu Lalzarmawia, Nl VL Rochhari, Pu K Lalrosiama, Pu C Lalhnunpuia te an ni a. Pu PC Zohlira Type writer hawhin bul an lo tan. Tunah erawh engkim Computer nen vek a thawkin Pathian ni apiangin vengchhungah 800 copies zet semchhuah thin a ni.

            Tin, 1994 kum lai hawl vel atang khan Information Center neiin vengchhung tul apiang atan hman thin a ni a. Hemi enkawltu atan hian Information Sub Committee din a ni.

             Hnam zia rang pho lang turin Hnam Lam lamah hian Vengthlang Branch YMA hian tan a la nasa thin hle a. Ni 5.3.1993 khan Branch chuan Cultural Troupe dinin Leader atan Pu C Lalremliana, Secretary atan Tv Lalzuithanga, Committee Member atan Pu HS Valalfakzuala, Pu K Lalhmunsiama leh Pu R Vanlallawma te ruat an ni a. Cultural Troupe member te hian Mizoram mai bakah India ram hmun hrang hrangah Hnam Lam entirin Mizoram ai an lo awh tawh thin a ni. Tunah tak hi chuan Cultural Sub-Committee dinin theihtawp chhuahin Hnam zia rang pho lang turin ke kan la pen mek zel a ni.

                 Infiamna chi hrang hrangah hian Vengthlang hi kan duai lo hle a , National Level thleng pawha fehchhuak thin infiammi pawh kan nei nual thin a. Hun engemawchen chu YMA hian Sports lamah hian Vengthlang hi a khaikhawm mai thin a. YMA hming hian intihsiakna chi hrang hrangah pawh lawmman lak a lo ni tawh thin a. Remchan zawkna avangin Vengthlang Sporting Club din a ni ta a. Amaherawhchu vawiin ni thleng hian YMA hian Sports Sub-Committee dinin Volleyball-ah phei chuan CYMA Sports ah 1993 khan Hmeichhe Team chu Champion in, 2004 khan Mipa Team pawh kan lo Champion tawh a ni.

                  Vengthlang Branch YMA hi Ruihhlo Do kawngah hian a thang harh hma hle a. Drugs Do chungchangah Action Committee ni 22.4.1995 khan din a ni a. Ni 12.7.1997 khan Ruihhlo Dona atan bawk hian Vengthlang huamchhunga NGO leh Kohhran hrang hrang ko khawmin, kalkhawmte chuan Joint Action Committee an din a.Mumal taka kal a harsat deuh avangin , ni 2.10.1999 khan Vengthlang Branch YMA chuan Security Cell a din ta a. Chairman atan, Pu K Lalthlengliana, Vice Chairman atan Pu C Vanlalnema, Conveners atan Pu F Lalfamkima leh Pu Zothansanga te chu ruat an ni a. Chuta tang chuan Security Cell chuan ngawrh takin Ruihhlo Do kawngah hian hma a la ta ngat ngat a ni.

             Kum 2006, kan Branch in kum 60 zet a tlin lawmna denchhen hian Zaipawl Sub Committee siam a ni a. Champhai khuaa thil tihpui eng engemawah hian Branch aiawhin an zai thin bawk.

             Vengthlang Branch YMA huamchhungah hian hruaitu hlun chawimawina Certificate Central YMA in a pek tawh mi enngemawzat an awm a, chungte chu : 
                  1. Pu Kalkhama            

                  2. Pu K Biakliana

                  3. Pu Rochhinga          

                 4. Pu K Rochhunga

                 5. Pu K Lalthlengliana

                 6. Pu BS Kailiana

                 7. Pu C Laldingliana

                 8. Pu R Hrangzama

                 9.Pu Zairikhuma

                 10. Nl C.Darthangpuii

         Tunah hian Vengthlang Branch YMA ah hian Member 1502 zet an awm a. Ni 9.10.2006-14.10.2006 khan Branch Kum 60 tlin lawmna hun ni 6 chhung kan hmang bawk.