Corruption (Eirukna, hleprukna, hlemhletna tenawm) tih loh ah engtenge Mizoram hmelma tih inzawt ila, kan chhan dan chu inang chiah lo mahse,Kangmei hi kan ram hmelma zingah chuan a tel phak ve chiang viaun awm e.
Mizoram kan luah atanga vawiin thleng hian kan ram thing leh mau te tukdarhin kan ei leh bar hmuhna atan kum tinin kan hal duai duai a, kan vah bak kan tikang duai duai bawk a, kuthlei leh kan suahsual vangin tul miah lovah ram hal ching kan la awm zui bawk a. Hetianga kan ram kan suasamna rah chu a chhe zawngin kan tel a. Kan tuihna a tlemin a kang chho mek a, kan chenpui ramsa leh nungcha te chenna kan tichhia a, kan ramah ruah tui tlak dan pawh a mumal lo chho mek zel a, thing zai tur kan nei mumal tawh lova, kan boruak awmdan pawh a danglam chak hle a, Nipui laiin a lum ta hle a, thlasik a khawvawt vin takin min tuam chho ta bawk a. Kan thing leh maute dimdawina tel miah lova kan awmzui zel chuan kan ram hmabak hi a thim ru riau a nia.
Kangmei ven a tul zia inzirtirna Hapta kan lo thleng leh dawn ta. Kum tina hetiang hun te hi a bika hman ngai tawh lovin kan zavai hian kangmei ven duhna rilru puin kangmei tichhuak lo tura tan lak thar sauh sauh hi kan ram hian a mamawh ta hle a nih hi.
Comments are closed.