KANAN VENG PASALTHA RAMCHHUAK HLAWHTLING

Get real time updates directly on you device, subscribe now.

LBS Suzuki All Mizoram Inter Village Football Tournament 2022 final-ah Champhai Kanan VC team chuan si hnih faiin Sialhawk VC team an hneh a, an champion ta a ni.
Final ni hian mipui an tam hle, inkhel hi tlai dar 3-a tan tur ni mah se chawhma dar 11 atangin AR Lammual lut tur an in tlar tawh, darkar 3 a la awmin Lammual a khat vek tawh, mipui an ri dur dur a, inkhelh tan a nih hma deuh chiahin ruah tlem a sur, boruak pawh a ti dai hle.
Inkhel tan a ni a, team hnite an fimkhur dun em em, nawr pawh an innawr na lo. Minute 15 an khelh tlin hmain Champhai Kanan chuan chance tha tak an nei, Tharpuia ball pek chu Muankima chuan goal-ah a pet, hei hi Sialhawk goalkeeper Ramnunsanga chuan a lo dang. Hemi hnu chiah hian Sialhawk lamin goal khung mah se goalkeeper lakah Danmawia a lo foul avangin referee-in a ham.
First half-ah team hnihte an fimkhur dun a, chance pawh an siam tam thei lo. Goal awm lovin first half a tawp a, second half-ah erawh thil danglam a thleng ta.
Minute 60 a ni a, Chhawnkima through ball pek tha zet mai chu mual dinglam sirah Lalthlanzova chuan umin box veilama Tharpuia tlan lut tan a cross a, ani hian changtu a nei lo, hnai tak atangin Tharpuia hian goal-ah a chhuih lut, si khat faiin Champhai Kananin hma an hruai. Hemi hnu chiah hian Champhai Kanan lamin an goal hnihna an khung teuh hle, Laltanzova chuan box pawn atangin a shot, a over chiah chiah. Hun tawp dawnah Champhai Kanan chuan penalty an hlawhchhuak.
Minute 87-ah Bd-a chuan box chhungah Tlanzova a ti tlu, referee chuan penalty a ham a, he penalty hi Tharpuia chuan petin goal-ah a chantir leh. Sialhawk lam hian goal an khung ve thei ta lo, hun a tawp a, si hnih faiin Champhai Kanan chuan hnehna an chang ta a, Mizoram veng leh veng, khua leh khua football inelna ropui berah Champhai Kanan chu an champion ta a ni.
He tournament hi June ni 24-a khelh tan kha a ni a, team 204 lai an tel, Team tel an tam a, champion nih hi a ropui thlawt a ni. Champhai Kanan hian champion nih an phu tak zet, an game a mawi a, final thleng pawhin attacking football mawi tak an khel thei, Tharpuia te unau an hmuhnawm a, Zozoa nen hian an inman em em. Tin, an captain Chhawnkima-a’n team a uap tha em em a, Lalramsanga thiam zia leh team innghahna a nih zia kan hmu chiang hle bawk. An tlarhnung te pawh an khawng a.
Final an luh theih nan hian Thenzawl East, Serchhip Jt. VC, Melbuk, Thakthing, Vaivakawn leh Republic Veng te an hneh a, an team hmachhawn te hi an tha hlawm khawp mai, final-ah si hnih faiin an chak chhunzawm bawk, champion hi an phu tak zet a ni. He Tournament-ah hian Game 8 khelin goal 28 an khung a, goal 11 an chhuah a, clean sheet vawi 3 an nei bawk a ni.
Champion Team Champhai Kanan hian Rs. 1,50,000 leh trophy an la a, pahnihna Sialhawkin Rs. 1,00,000 leh trophy an la. Semi final lut team hnih ten Rs. 40,000 ve ve an dawng a, Fair Play hi Sialhawk VC team-in dawngin pawisa fai Rs. 20,000 a tel.
He Tournament-ah hian Champhai Kanan playmaker Lalramsanga chu Best player atan thlan a ni a, pawisa fai Rs. 10,000 leh trophy a dawng a, Champhai Kanan goal khung khawl, he tournament-a goal 13 ngawt khungtu R. Ramdinthara chu top scorer niin pawisa fai Rs. 5,000 bakah trophy a dawng a, Clean Sheet vawi 7 neitu Lengpui Goalkeeper R. Lalhmangaihzuala chu best goalkeeper atan thlan a ni a, Rs. 5,000 leh trophy a dawng a ni.
Hun rei tak event lian kan neih theih loh hnuah Mizoram pumpui huap football inelna lian chu mipuiin kan hlut hle a, Final entu AR Lammualah an khat thap, Zonet chuan Youtube lamah pawh an LIVE bawk a, Youtube livestream hi mi 54,000 in an en nghe nghe.
Mizoram Football Association hmalakna a ropui a, sponsor-tu mi chi hrang hrangte an fakawm bawk a. He Tournament-ah hian player tha tam tak an rawn inlar, Mizoram Premier League club-te chuan player thar an la teuh dawn tih a chiang a, tournament khelh zawh hma pawhin player inlei an awm nawk tawh bawk a, Mizoram football-ah rah tha he tournament hian a chhuah a ni.  inkhel.com

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More