KANGMEI CHUNGCHANGA HMA LA THA TE HNENAH CHAWIMAWINA

Get real time updates directly on you device, subscribe now.

Mizoram hmun dang rualin nimin khan Champhaiah Bawrhsap Maria CT Zuali, Chairman, District Level Committee on Green Mizoram hovin Green Mizoram Day pualin hun hman a ni.
‘Tuihna leh boruak tha siam nan thing i phun ang u’ tih thupui thlan hmangin Green Mizoram Day vawi 23-na hman a ni a.
Bawrhsap Maria CT Zuali chuan, nitin khawsak kawngah thing leh mau kan hmang nasa tih sawiin, nitin mamawh ni mahse kan hman tlem telh telh a tul a, loh theih loh a nih loh chuan hman ni lo se a duhawm hle a ni, a ti. Thing puitling ni turin hun a mamawha, tuna phun hi nakin lawka kan tu leh fate tan a ni tih kan hre reng tur a ni, a ti a. Thing tiak phun mai duh tawk lovin enkawl leh cheibawl kawngah tan kan lak chhunzawm zel a ngai dawn a ni, a ti bawk. Thingphun hnatlangte chu a puitling thlenga enkawl chhunzawm turin a chah a ni.

Green Mizoram Day hawnna program DHO Office Complex, New Champhaia hman kaihhruaitu DFO Champhai Lalduhthlana chuan Green Mizoram Day hman tan kum 1999 atanga nikum thlengin Mizoramah thing tiak 16,61,720 phun tawh niin, 23,20,189 sem chhuah tawh a ni, a ti a. Champhai Forest Division bikah chuan 1999
atanga 2020 chhungin thing tiak phun leh sem chhuah zat chu 64,247 a nih thu sawiin,
nikum Green Mizoram Day-ah thing tiak 240 phun a nih thu leh, a tiak 2,088 sem chhuah a ni tih a sawi bawk.
Ningani thleng khan VC, NGO leh sawrkar department-ah thing tiak 2,404 sem chhuah a ni a; mimal, VC, pawl leh sawrkar department
mamawhte hnenah pek chhuah zel tum a ni, a ti a. Thing puitling mekte dimdawi a tul thu sawiin, thing phun tam bansan chuang lo a, a puitlin ngei theih nana tha thlah lo a tanlak a tul thu a sawi a. Green Mizoram programme
kaltlanga kan ram ti hring mawi leh tur chuan kan thinlung a hring mawi hmasak a ngai tih sawiin, theihtawp chhuaha thawhpuiah district mipui a sawm a ni.
He hunah hian kangmei ven kawnga hma la tha khua leh chanchinbu hnenah Bawrhsap-in
lawmman a hlan a. Kangmei veng tha khuate chu a indawt danin Lungphunlian, Tualcheng leh Vaphai te an ni a. Chanchinbu hma la tha
berah Pasaltha, chu thlan a ni a, Lenrual pahnihna niin, Rihlipui chu pathumna a ni.
F.Lalnunhlima, RO Champhai chuan thingphun hnatlang neih dan turte a sawifiah hnuah, P. Lalhmingliana, Principal, Govt
Champhai College-in lawmthu sawina neiin hawnna hun hi a khar a.
Hawnna inkhawm zawhah hian hmun 6 ah
inthendarhin mahni thing phunna tur hmun theuhah thingphun hnatlang neih chhunzawm nghal a ni. New Champhai-Zotlang road-ah Champhai Nature Conservancy, New Champhai-Zokhawthar Road Ruantlang VC area chinah Ruantlang
Branch YMA, New Champhai-Zokhawthar Road Mualkawi VC area chinah District Level Committee on Green Mizoram member-te
leh an thawhpuite bakah Sawrkar hnathawk hnatlang dangte, New Champhai-Zokhawthar Road Melbuk VC Area chinah Melbuk Branch YMA, Hringlang tlang District Park-ah District Park Committee member-te leh Mualkawi Branch YMA te, Mualbuhvumah Sub-Hqrs. YMA te an hnatlang a ni.
Nimin Green Mizoram Day pual hun hmanah hian District Level Committee on Green Mizoram member-te leh an thawhpui te, YMA, Champhai Nature Conservancy (CNC) leh Chanchinbu mite an tel a, hnatlanga chhuak hi mi 387 an tling a ni.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More