Nimin chawhnu khan Road Protection Squad Champhai chuan Champhai Venglaia kawngpui nekchep zawnga insak, lirthei hung leh hmalakna dangte an endik a, dan palzut mante pawisa chawitir niin, insenghawi tura hriattirna lehkha pek an ni.
Champhai District chhunga lirthei chevel leh mihring an him theihna tura Champhai District Magistrate-in September ni 21, 2020 a thupek a lo chhuah tawh bawhzuina kalpui zelah nimin chawhnu khan Road Protection
Squad Champhai chu an Chairman Pu Lalnunfela Chawngthu, Sub-Divisional Magistrate hovin an thawkchhuaka, Champhai Venglaia kawngpui nekchep zawnga insak, lirthei hung leh hmalakna dangte an endik a, dan palzut mante pawisa chawitir niin, insenghawi tura hriattirna lehkha pek an ni.
Nimin Road Protection Squad-te endikna kalpui hmang hian kawngpui neka insak leh hmalaknate, lirthei ding leh bungraw hungte la sawn tura hrilh an ni a. Lirthei dah phallohna kawngpui hrula dah 13 te Section 177 of Motor Vehicle Act (MV Act 177) hmanga hrem an ni a. Titawhlo tura hriattir zel an ni. Heng bakah hian mi 5 hnenah lirthei leh bungruate dah sawn tura hriattirnapek an ni bawk.
Road Protection Squad Champhai chuan vantlang tana hnawk leh kawngpui dal zawnga hmalakna leh hnawk siamte hnenah a rang lama seng hawi tura hriattirna pein a tul angin hma a la thin a. Nikum leh kumin chhung khan Champhai khawpui chhung hmun hrang hrangte fangkualin endikna an lo nei tawh thin a ni. A remchan dan ang zelin veng hrang hrangte fangin, khawtlang hruaitute nen endikna an kalpui chhunzawm zel dawn a ni.
Nimin chetchhuahnaah hian Road Protection Squad Champhai-te hi Champhai Venglai VC ten an tawiawm a ni.
Comments are closed.