KEILUNGLIAH ENKAWL ZUI ZEL DAN TUR REL

Get real time updates directly on you device, subscribe now.

Champhai khawpui kianga luang Keilungliah lui khuah mek, peihfela hawn a nih hnua a enkawl zui zel kawnga hmalatu tura Sawrkarin a din, ‘District Level Committee on Post Completion Management & Maintenance of Dam Reservoir cum Recreation Centre at Keilungliah’ chu nimin chawhnu dar 1 khan an Chairman, Pu James Lalrinchhana, District Bawrhsap hovin DC Conference Hall-ah an thukhawm.

Chairman Pu James Lalrinchhana chuan Keilungliah tuikhuah chu Champhai District tana rohlu leh chhawr tangkai tur a nih thu sawiin, project chhawr tangkai a nih theih nan nakin zel ngaihtuah chunga hmasawn theihna awmte mitthla thiam a ngai a ni, a ti a. Keilungliah tuikhuah chu mite ngaihven leh tlawh chak a nih tawh thu pawh sawiin, hlawhtling taka khuah a nih theih nana PHE Department-te hmalakna leh a cheibawlna tura UD&PA Department atanga fund hmuh tur Committee hmaa pharh tura thlen a ni chu fakawm a tih thu a sawi a. District Level Committee siamrem leh huam zau zawk din a nih theih nan thuneitu sang zawkah rawtna thlen tum a ni, a ti a. Line Department hrang hrangte leh khawtlang inkarah thawhhona tha a awm phawt chuan hlawhtling taka enkawl a nih theih thu a sawi bawk.

He hunah hian Member Secretary Pu ZD Dengthuama, EE, PHED Champhai WATSAN Division hnen atangin Keilungliah tuikhuah dinhmun tlangpui ngaihthlak a ni a. Watch Tower – Pentagon Glass House leh Valve Chamber-te siam mek a nih thu leh tun dinhmuna hmalak theihna tur hmachhawp awmte November thla chhunga zawhfel vek hman beisei a nih thu a sawi a. A tira expenditure sanction aia a san belhna leh hmalak tul angte bawhzui nan revise estimate cheng vaibelchhe 3.897 siama thehluh tawh a nih thu a sawi bawk.

Thutkhawmah hian Keilungliah tuikhuah cheibawl kawnga UD&PA Department atanga hmalakna tur fund cheng nuai 51 beisei chungchang leh tangkai taka hman a nih theih nana rawtna awmte sawiho niin pawm a ni a. Keilungliah tuikhuah leh avelte tangkai leh mumal zawka hman a nih theih nana rawtnate duang a, felfai taka phuahkhawm turin mawhphurhna la tur bik inruat a ni a. Ruahman dan chuan power lakluhna, Island, a hungna, tlawhtute chawlh hahdamna, hnawm sawngbawlna, tui thianghlim in tur, gate, floral bed, community toilet, steel wire rope bridge, parking area leh tul dangte siam ni se tih a ni a. Tuikhuaha bawlhhlawh leh leinawi lut tur dan nana hmalak tulte ngaihtuahho a ni bawk a. DM&R kaltlangin chetsual palh thulha tangkai tur hmanrua leh quick response team siam tuma hmalak a nih thute ngaihthlak a ni a ni. Sawrkar notification bakah District Level Committee-a tel turte thlan an ni a; rawtna hi Sawrkara thlen ni se tih a ni bawk.

Heng bakah hian Line Department hrang hrang kaltlanga hmalak theih dan turte sawiho a ni a. Project enkawl zelna leh him tlan nan mipuiah inzirtirna neih ni se, district magistrate thuchhuah dinglai zawma himtlanna tur ngaipawimawh turin mipuite chah an ni a. Tlawhtute tan pawh en/luh man felfai tak siam a la nih tur thu tarlan a ni bawk a. District Level Committee chuan Keilungliah tuikhuah tlawhtute chu bawlhhlawh paih mai mai lova faina ngaipawimawh theuh turin a chah nghal bawk a ni.

District Level Committee on Post Completion Management & Maintenance of Dam Reservoir cum Recreation Centre at Keilungliah, Champhai thutkhawm tum hnihnaah hian Executive Vice-Chairman Pu C.Lalhmachhuana, SE, PHED Champhai WATSAN Circle; Member dangte leh sawm bikte an tel a ni.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More