Inrinni tlai lam dar 3:00 bawr vel khan Burma sumdawng, Ngokhando, kum 42 s/o Hawliankhuai Langzang khua, Myanmar chu Khawbung khuaa Myanmar ram buai hma atang awm tawh Hrangthanche kum 37 s/o Thanhleiduma (L) Myanmar mi, Hnahthial khua a awm mek chuan a that niin thu dawn a ni.
Dungtlang Police OC sawi danin Ngokhando hian Hrangthanchea hi thing zaina, Chain Saw man a bat a thing a, an thu a inbat fuh lo va.
Hrangthanchea chuan Ngokhando hi a lu ah tuboh a chhu in, a thih hnuah an chenna In thlang Dumlui kawrah a ruang hi a lo paih niin a insawi a. A thil tih hi hriatchhuah a nih hma in amah hi a inpuang a. Tualthattu a puh hi Dungtlang Police ah inpek tuma a kal chu, Bike in a chetsual avangin Khawbungah a let leh a. A kal hma hian Dungtlang Police ah inpek a tum thu hi khawtlang hruaituten lo hriain hemi a rawn let leh hi thil awmzia zawtin khawtlang hruaitute hian a awmnaah an va kal chilh a. Hemi hnu hian Dungtlang Police te chuan Khawbung atangin an hruai ta a ni.
Ngokhado chunga vanduaina a thlenni ni 13.8.2022 (Inrinni) hian a thianpa nen Leithum atangin chawhnu lama Khuangthing lam pan leh nghal turin chawhma lamah Khawbung ah an thleng a. Tum danga pawh an lo riah thinna leh chaw pawh an eithinnaah an innghat a. An kal chhuah leh hmaa ba thing a a kal chu vanduaina a chungah a lo thleng ta a ni.
Ngokhando hi nupui fanau neia khawsa niin fa panga naupang te te neiin pakhat erawh vanduaithlak takin a boral tawh a ni.
Mitthi ruang hi nimin khan Khawbung PHC ah enfiah a nih hnuah an khua, Hlangzang a vui turin lak a ni. Hrangthanchea hi Dungtlang police in an kawl a, vawiin hian Champhai District Court ah hruai a ni ang.
Comments are closed.