KHAWCHHAK TLANGDUNG HARSATNA SUTKIAN A NI DAWN TA

Khawzawl leh East Lungdar inkar 132kV line chu niminpiah khan hlawhtling taka enchhin a ni.
Mizoram khaw chhak tlangdung ten kawlphetha lama hatsatna an tawh thinte sutkian a nih theihna tura Mizoram sorkar hmalakna kal mekah, Serchhip Bukpui atanga East Lungdar leh Khawzawl 132 kV Line kaltlanga kawlphetha lakluhna tur enchhinna, Test Charge chu nimin piah khan hlawhtling taka neih a ni a. Chawhma dar 10:08 khan Khawzawl Power Sub-Division SDO, K. Lalzamvela chuan line hi tinungin Khawzawl 123kV Sub Station atangin East Lungdar hi pek chhin a ni a, buaina leh harsatna thleng a awm lova. Hemi hnu, chawhnu dar 2:00 khan Lungdar 132kV Sub-Station atangin Khawzawl Sub-Station hi pek ve leh chhin niin, hlawhtling taka enchhin a ni. Power Department-a thawkte sawi danin,
132kV line test charge neih hian a vawi khatnaah hlawhtling nghal sawi tur avang hle a, tum tum hian vawi khat enchhinnaa a hlawhlting chu lawmawm an tih thu an sawi.
Khawzawl leh East Lungdar inkar 132kV line hlawhtling taka enchhin a nih tak avang hian Saitual lam 132kV line chhiat chang pawhin Lungdar lam atang hian 132kV line kal tlangin a lak theih tawh dawn a. Khawzawl to East Lungdar 132kV line enchhinna hi Sr EE, Duhsanga chuan a ho a ni.
Aizawl Zuangtui atang hian Mizoram chhim lam leh khawchhak lam ten Power Supply hi an dawng thin a. Zuangtui atang hian Serchhip Bukpui-ah 132 kV Line a kal bakah khawchhak lam pekna, Saitual kaltlangin Khawzawl 132 kV Line thlun a ni a. Hemi bakah hian Zuangtui atang hian Melriat kaltlangin Lunglei lamah 132 kV Line hi thlun a ni bawk a. He Line kaltlang hian Zuangtui lam atangin Serchhip pawhin Power supply a dawng thei tawh bawk a. Hetiang a nih avang hian khawchhak lam tlangdung ten tun hma lam zawng aiin kawlphetha a dawng tha thei tawh tura ngaih a ni.