Champhai Nature Conservancy (CNC) Executive Committee chuan, thing leh mau humhalhna leh Champhai District-a mi thahnem tak tui tlan mek, Khawchhak Tuipui venhim dan tur an sawiho.
Nizan hmasaa CNC Executive Committee thukhawm chuan, Khua leh Veng hrang hranga tuahthing atana thing an kih thin te a lo tlem deuh deuh theihna turin Thing aiah Eirawngbawlna Gas uar zawka mipuiin kan hman theihna tura hmalak tha an ti a. Thing hmang nasa, Hostel, Damdawi in, Jail, School leh Force miten thing an hman tihtlem a nih theihna turin Mizoram Sorkar hotute hnenah rawtna leh ngenna thlen ni se, an ti a. Chhiatni-thatni a thing hman thin a lo tlem theihna turin YMA Sub-Hqrs. Champhai hnuaia Science & Environment Sub-Committee nen hemi chungchang hi sawiho ni se, an ti.
CNC chuan Khawchhak Tuipui chu kawng hrang hranga venhim a tul tih sawiin, tunah hian Khawchhak Tuipui lui tibuai leh tichhe thei te an zirchiang mek a, Drone hmanga lui dung thla lain Khawchhak Tuipui venghimtu din tura Sorkarah rawtna thlen ni se, an ti a. He lui dinhmun an zirchianna, Video hmanga en theih tura hma an la mek chu an zo fel tep tawh a ni. Kumina Champhai leh a chheh vela thing an phun dinhmun enfiah a, a tul anga enkawl zui hna thawh ni se, an ti a. Thing phun tawhte chu vawiin hian enfiahin, hun remchang hmasaber ah enkawl zui a, thing phun te hung tha leh a bul thianfai tura hnatlang neih ni se, an ti bawk.
Bawlhhlawh paihna hmun ni lo, Champhai leh Zokhawthar inkar kawngpui kama mi thenkhatin bawlhhlawh an paih thin chu, hun remchang hmasaber-ah DUDO sawipui ni se, a tul anga phungbawm sawmin, he kawngpui sira bawlhhlawh thianfai hian hnatlang koh ni se, an ti bawk.
Comments are closed.