Nilaini khan Khuangthing khua Pi Hmunsiami, kum 64 mi chu rulin a chuk hlum.
Khuangthing atanga thudawn danin, Nilai ni khan Pi Hmunsiami kum 64 mi hi amahin Loah fehin tlai khaw thim thlenga a haw loh avangin a pasal MC Lalngaihdama chuan thian pahnih sawmin lo lamah an zu zawng a; Thlamah a chawfun la theh loh an hmuh hnuah zan thim hnuaiah an zawng zui a. Vau bul hnaiah Pi Hmunsiami hi thiin an hmu ta a ni. A kheimit vei lamah leh a kut dinglam zung tangah rul chukna hnu nei ngeia hriat hmuh a ni a, Pi Hmunsiami hian a chawfun a la theh hman loh avangin Rulin a chuk hun hi chawhma lam nia rin a ni. A ruang hi lumen niin nimin khan Khuangthing thlanmualah vuiliam a ni.
He chhiat tawhna thleng hi an hriat veleh DFO Champhai, Lalduhthlana hovin EF&CC Dept chuan Khuangthing hi an pan nghal a. Pi Hmunsiami chuktu hi Rulngan ni ngeia an hriat thu an sawi a, a ruang chungah pangpar dahin Rs. 10,000-in an ral a ni.
Kumin hian Khuangthing khuaah rul chuk vangin mi 2 an thi tawh a, tunah hian rul chuk vangin Khuangthing khaw mi pakhat chu Aizawl lama enkawl mek a ni bawk. Khuangthing Health Sub Centre-a thawkte chuan Rul chuk mi 20 vel an enkawl tawh tih an sawi a. Hetianga Khuangthing khuaa Rulin mihring a chuk tak fo avang hian East Tuipui Bialtu MLA Ramthanmawia, Dr. ZR Thiamsanga, MLA leh Champhai District Bawrhsap Maria CT Zuali te chuan hma la nghalin, nimin khan Khawbung PHC-ah hian Rul chuk damdawi, Antivenom dah a ni.
Comments are closed.