KOHHRAN 2-IN SAKRAMEN ATAN MIZORAM SIAM HMANG TURIN RORELNA SANGAH THLEN DAWN

Get real time updates directly on you device, subscribe now.

Champhai North Presbytery inkhawmpui chuan sum leh paia hlemhletna (Corruption) do kawnga hma la tura Synod rawtna leh, Mizorama Grape thar atanga siam chhuah, Sakramental Wine atana hman rawtna chu Synod inkhawmpuia kal zel turin an pass a.

Mizoram UPC Tuichangral huap inkhawmpui, Dungtlanga neih ah Grape atanga siam Wine chu Sacramental Wine a hman ve rawtna an pawm a, an kohhran inkhawmpui lian, Assembly ah thlen ni se, an ti.

Presbytery inkhawmpui nizana tiak taah, Inrinni khan nilengin rorel inkhawm neih a ni a. Rorel tura Agenda chhawpchhuahte sawiho a nih bakah nakkum inkhawmpuina hmun tur leh programme ruahmante thlir lawk a ni bawk. Champhai North Presbytery inkhawmpuiah hian Pastor bial pahnih atangin Mizoram chhunga Grape thar chhuah Sacramental wine-a hman rawtna hi a lut a, palai te’n an sawiho hnuah Synod-a kal zel turin an pass a ni. Hei baka hian sum leh paia hlemhletna (Corruption) do kawnga hma la tura Synod rawtna lut chu Synod-a kal zel turin pass a ni bawk.

Synod-a kal zel tur thu an pass zingah Hruaitu thar hlan kaihhruai siam rawtna chu Synod Worship Committee-ah thlen ni se, an ti a. Certificate pawimawh sorkarin a siam turah kaihhruaina, Synod siam tir rawtna chu SEC a kal zel turin an pass bawk a. Pastor Quarters leh FG&CC Counsellor-ah Insukna khawl dah rawta chu Synod-a kal zel tura pass a ni a. Presbytery sum kawltu, Finance Officer tih thin chu Treasurer tia thlak ni se, an ti bawk. Champhai North Presbytery vawi 18-na chu Champhai Electric Veng Kohhranah nghah a ni ang.

Champhai South Presbytery ah pawh Inrinni khan nileng in Palai Rorel inkhawm neih a ni a. Bial hrang hrang atanga lut Agenda 5 te an ngaihtuah ho a. Agenda lut zingah Zokhawthar Vengsang indan dilna chu pawm niin, Presbytery Standing Committee ten lo bawhzui tura ruahman a ni a. Chhungte Kohhran in Biak In sak an dilna pawh pawm a ni a; Synod Hospital, Durtlang-a Doctor rawih dan en that ni rawh se tih chu pawm niin, Synod Inkhawmpui Agenda ah putluh a ni ang.

Champhai South Presbytery vawi 18-na chu Ruantlang Kohhran Biak In ah October ni 6-8, 2023 chhungin hman a ni ang. Champhai South Presbytery ah hian Pastor Bial 5 awmin, Kohhran 23 a awm a, Kohhran Upa 137 leh Pem Upa 3 an awm a. Kohhran member 15,791, mipa 7722 leh hmeichhia 8069 an awm a, dan zawhkim 10,715 an awm mek a; Kohhran chhungkua 3,333 an awm mek bawk.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More