Champhai District Bawrhsapin Champhai District chhunga Kuhva rah leh dan lova sumdawnna bungraw phur lirthei tlan khapna thupek a chhuah hnuah Kuhva rah man leh a ni.
Champhai DC Maria CT Zuali chuan October ni 14 khan Champhai District chhungah Kuhva bakah Dan lova sumdawnna bungraw phur lirthei tlan khapna thupek a lo chhuah tawh a.
Thupek chhuah a nih hnuah pawh hian dan lova lakluh Kuhva rah man tur a la awm a. Zirtawpni khan 8th Assam Rifles te chuan Myanmar atanga dan lova phurh luh Kuhva rah hmun hnihah manin, Kuhva rah ip 110 phurtu lirthei, Sesih atanga Champhai rawn panpui leh ip 70 phurtu lirthei Champhai atanga Hnahlan lama kalpui tur nia sawi te an man a. Kuhva rah ro an man hi a vaiin ip 190 (Kg 10,800 a rit) niin Cheng 42,98,400 hu a ni a, Zirtawpni khan Custom Preventive Force, Champhai kutah an hlan nghal a ni.
Bawrhsap thupek chhuah tuk, October ni 15 khan Assam Rifles te’n Champhai Town Area huam chhungah LPK Truck 6 atangin Kuhva rah ro Kg 26,000 a rit, Cheng 1,01,40,000 hu an lo man tawh bawk a. Zirtawp zan khan Champhai Police te’n Champhai atanga phurh chhuah tur, Lirthei pahnih atangin Kuhva ip 60 an man bawk a, Inrinni khan Custom Preventive Force, Champhai kutah an hlan nghal a ni.
Zawhna chhangin Champhai District
Bawrhsap Maria CT Zuali chuan, khapna thupek hian Tuipuiral tlangdung lamah chuan zawm a hlawh thawhkhata a hriat thu sawiin, Champhai khawpui chhungah erawh chuan man tur a la awm zeuh zeuh tih a sawi a. Zawhna chhangin Champhai SP Lalrinpuia Varte chuan, tun dinhmunah Champhai Police Check Gate, Khankawn kaltlangin Kuhva phurh tlang a hriat loh thu sawiin, an naute pawh uluk taka vilin Check Gate-ah hian CCTV vuah vek a ni, a ti bawk.
Comments are closed.