Nimin khan Champhai Fast Track Special Court chuan naupang pawngsualtu mi pahnihte chu kum 10 chhung Lung In tang turin an chungthu a relsak.
Nimin Champhai Fast Track Special Court-in thiam loh a chantir Lalbiakliana, kum 39 mi, Khawzawl Darngawn Venga cheng, Myanmar mi chuan hmeichhe naupang kum tling lo pakhat chu a chhungte awm loh laia a pawngsual thin bakah sawi chhuak lo turin a vau bet bawk a. Hmeichhe naupang hian a chhungte bulah sawi chhuakin Kumin February ni 13 khan pawngsualtu lakah hian thubuai siam sak niin, damdawi lam thiamna hmangin pawngsual hi a thleng ngei tih Court chuan a finfiah tih tarlan a ni.
Court-in thiam loh a chantir pakhat zawk Lalrinchhana kum 18 mi, Khawzawl Vengthar hian an chhungte hnaivai hmeichhe naupang kum tling lo chu kum 2020 September ni 23 khan pawngsualin, sawi chhuak lo turin a vau bet zui bawk a. Hmeichhe naupang hian a chhungte hrilhin Kum 2020 September ni 25 khan pawngsualtu lakah hian thubuai thehluh a ni.
Special Public Prosecutor Lalchhuansanga Sailo chuan pawikhawihtu pahnihte hi pawi an khawih ngei a ni tih finfiahna a awm avangin, a na thei ang bera hrem turin Court a dil a. Pawikhawihtute pahnih Ukil chuan vawikhat pawi an khawihna a nih avangin hremna hniam thei ang ber a dilsak thung.
Pawikhawihtu pahnihte chungthu hi T.Saikunga, Presiding Officer, Fast Track Special Court, Rape & POCSO chuan ngun taka a ngaihtuah hnuah pawikhawihtu mi pahnihte hi vawikhat pawi an khawihna a nih avangin an chhungah hremna a hniam thei ang ber pein, POCSO Act Section 6-na tlawhchhanin kum 10 chhung Lung In tang tur leh Rs. 1000 ve ve chawi turin an chungthu a rel sak a.
Fast track special court hian thubuai an neihte hi thla hnih pawh tling lovah an chingfel hman a ni. Pawikhawihtu pakhat zawk Lalbiakliana hi India khua leh tui a nih loh avangin 14 Foreigners’ Act tlawhchhanin thubuai siam belh a ni bawk.
Comments are closed.