District Level Narco Coordination Centre (NCORD) Committee, Champhai District thutkhawm vawihnihna chu nimin chawhma khan an Chairman James Lalrinchhana, District Bawrhsap hovin SP Office-ah neih a ni.
Chairman James Lalrinchhana chuan, Champhai District-ah ruihhlo do kawnga official leh YMA te inkara thawh hona tha tak a awm thin chu fakawm a tih thu sawiin, Mizoram mai ni lo, India ram laili thlenga ruihhlo tawlh thlakin bu a khuar theih avangin ramri depa awm Champhai District atang hian theihtawp chhuaha hmalak a tul a ni, a ti a. Champhai District-in engtin nge hma a lak tih leh ruihhlo do kawnga tanrualna chu mite thlir leh ngaihchan a nih avangin inthlahdah lo leh inenfiah chung zela kal a ngai tih a sawi bawk. District Level Narco
Coordination Centre chu ruihhlo do kawnga inrawnkhawmna leh thawh hona tha zawk awm theih nana din a ni, a ti a. Official program bakah puipunna hmunahte uar lehzuala ruihhlo leh a kaihhnawih chungchang inzirtirna tam zawk neih a tul tih a sawi bawk.
Convener Lalrinpuia Varte, SP Champhai chuan ruihhlo tawlh leh hmansual chu ram tana hlauhawm a ni tih hriain, Sawrkar laipuiin NCORD chu kum 2016 ah a din tih sawiin, kum 2019 ah siam that niin, tunhnaiah chak lehzuala kalpui a ni, a ti a. Kumin May ni 10 ah District Level NCORD Committee member-te State Sawrkarin a siam fel a, hmalaknate Narcotics Control Bureau lamah online hmanga report zel a ni, a ti.
He hunah hian Champhai District Police leh Excise & Narcotics Department Champhai hmalakna kaltlanga kumin chhunga ruihhlo man zat leh Narcotic Drugs and Psychotropic Substances Act (ND&PS
Act), 1985 hnuaia case ziahluh dan tlangpui Addl. SP C.Lalengliana leh Asst. Commissioner of Excise & Narcotics Champhai Vanlalvura Ralte te hnen atangin ngaihthlak a ni.
He huna tarlan a nih dan chuan January ni 1, 2022 atanga nimin September ni 29, 2022 thlengin Champhai District Police-ten ND&PS Act, 1985 hnuaiah case 65 an ziaklut a, mi 83 man niin heng zinga 23 te hi ramdang mi an ni. Heroin gram 9694 (kg 9.7) man niin, tualchhung market-a a hlut zawng Cheng Nuai 223.80 a ni a. Meth mum 8,18,500 (kg
84.05), a hlut zawng Cheng Nuai 1637 hu bakah Pseudoephedrine mum 1,80,000 (kg 28.80), Cheng Nuai 126 hu an man bawk. Ruihhlo an man hlut zawng hi Cheng Nuai 1986.80 vel a ni.
Excise & Narcotics Department Champhai ten ND&PS Act, 1985 hnuaiah case 49 ziak lutin mi 49 an man a. Heroin kg 7.765, tualchhung rate-a Cheng Nuai 93.18 man; Methamphetamine mum 1,50,700 Cheng Nuai 452.1 man; Ganja kg 3.2, Cheng 3,840 man leh Alprazolam mum 218, Cheng 2,180 hu an man bawk a. An man zawng zawng hlut zawng hi Cheng Nuai 545.34 vel a ni.
Comments are closed.