Kumin chhungin Vaibelchhe 9 chuang man ruihhlo man tawh

Kumin kum tir atanga nimin thleng khan Champhai Police te chuan ruihhlo chi hrang hrang Cheng Vaibelchhe 9 chuang man an man tawh.

Ministry of Social Justice hnuaia National Institute of Social Defence (NISD) bul tuma ni thum chhung awh tur, Champhai District chhunga Police-te Damdawi hman khawloh laka inven dan tur zirtirna hun, nimina SDPO Conference Hall, Champhai Vengsanga neih tanah he thu hi Course Coordinator, Champhai Addl. SP Francis Lalnuntluanga Ralte chuan a sawi a. An ruihhlo man te hi Heroin Kg 1.926, Rs 69,56,800 man; Ganja Kg. 108.43, Rs 5,48,000; Methaphetamine Kg 29.228, Rs 3,90,00,000; Pseudoephedrine Kg 335, Rs 5,14,56,000 man te a ni, a ti. 

Champhai Addl SP hian training-ah hian drugs leh ruihhlo dang, thalaite suata ram leh hnam run mektu hi engtia lo beih tur nge? Kohhran, chhungkua leh khawtlanga bua khuar tlat hi engtin nge nuai bo anih theih ang tih te zir a nih dawn tih a sawi a. Ruihhlo leh a kaihhnawih lakah Police te ngei pawh an fihlim bik loh avangin hemi kawnga zirtirna leh infuihtharna hun buatsaih chu thil tihmakmawh a ni, a ti bawk.

Champhai Addl SP chuan, Mizoram kaltlanga

ruihhlo tawlh zinga tam ber chu Champhai District kaltlanga lo lut a nih ngei pawh a rinawm tih sawiin, a ven kawngah Champhai Police ten ngawrh taka an beih thu a sawi a. Champhai District chhungah Police 163 an awm mek tih sawiin, Champhai Police Station chu India ram puma titha teha 19-na leh Norh East bika pakhatna a ni thei chu a chhuanawm hle a ni, a ti a. Training pe turte leh training a tel turte hun hlawhthlak tak an neih theih nan duhsakna a hlan a ni

Khuallian Lalrochami Ralte, CJM Champhai

chuan dan leh thupek kenkawh leh ram venhim kawnga Champhai Police-te thahnemngaihna chu fakin, Aizawl District tih loha Case tamna ber ni chunga tlin taka hna an thawk thin chu fakawm a tih a sawi a. Damdawi hman khawlohna hluar zel chuan chhungkua leh khawtlang mai duh tawk lo va, venhim hna thawktu Police-te ngei pawh a kan kai tak zel avangin hemi kawnga inzirtirna buatsaih a ni thei chu lawmawma ti a. Damdawi leh a kaihhnawih hman sual chuan rukruk leh tualthahná a tipung a, hemi do let tur hian khawtlang pawh tanrual a hun tawh takzet a ni, a ti a.

CJM chuan India ramah Mizoram chu NDPS

Case hmanga hremna lekkawh tha ber zinga mi a nih tih sawiin, NDPS Case za zela 91 chu hremna pek an ni tih a tarlang a. Police, Excise, NGO, Mipui leh Court-te inkara thawhhona tha awm vang chauh a ni a, hemi kawnga thawhhona tha tak awm mek chu chhunzawm zel ni se a duhawm ngawt ang, a ti. National Crime Bureau Report, 2013 atanga neihah ram chhungah Mizoram chu NDPS Case hmanga hremna lek kawh tha ber (Conviction rate sang ber) kan ni leh zelte chuan dan leh thupek kengkawhtute inpekna leh mawhphurhna hlenzia a tarlang a, hemi kawngah hian tha taka thawhho zel pawh a tul a ni, a ti bawk.

Champhai District chhungah hian Police 163 an awm mek a, training-ah hian Police, 40 an tel a. Nimin training hawnna hun hi Lalengliana, DSP Champhai chuan lawmthu sawiin a khar a ni.