Electoral Roll thar ber – Final Electoral Roll 2021 chu nimin chawhma khan Champhai DC Conference Hall-ah District Election Officer, Pi Maria C.T. Zuali’n a tlangzarh.
District Election Officer, Pi Maria C.T. Zuali chuan, Special Summary Revision of Electoral Roll chu kum tina kalpui thin – Vote nei tharte Electoral Roll-a an luh theihna tur leh siam that ngai leh a dangte buaipuina tura kalpui thin a nih thu sawiin, a hun taka Electoral Roll thar ber peih fel a nih theihna tura Election Officer leh Staff-te, ERO, AERO leh BLO zawng zawngte thahnem ngaihna chu fakawm a tih thu a sawi a. Anmahni tawiawma lo pui thintu NGO, khawtlang hruaitu leh Political party ai awhte chungah pawh lawm thu a sawiin, hun hlu tak senga a tlangzarhna hriatpuia kal khawm zawng zawngte chungah lawm thu a sawi bawk.
He hunah hian Pu Lalnunfela Chawngthu, Election Officer chuan, Electoral Roll tlangzarh tak din hmun tlangpui tar langin, Final Electoral Roll chu Champhai district chhunga Assembly Constituency 3-te tana buatsaih a nih thu leh Khawzawl district-a bet tawh khaw thenkhatte chu 23-Champhai North Assembly Constituency-ah an la awm thu a tar lang a. Roll hearing neihna hmunahte uluk taka document en dik a nih thin thu leh Economics&Statistics Department Champhai-te nena tang kawpin document lem leh dik lote zawn chhuah hna ngawrh taka kalpui thin a ni, a ti a. Kum hmasa lamah Birth Certificate lem siam chawp 47 lai an man thu leh kumin bikah Birth Certificate dik lo 17 man a nih tawh thu leh 36 dangte chu rin hlelha chhuizui an nih thu a sawi bawk a. Birth Certificate dik lo hmanga Electoral Roll-a luh tumte chu chhui zuia man sak zel an tum thu a sawi bawk.
Electoral Roll 2021 tlangzarh takin a tarlan danin – Champhai District chhunga Assembly Constituency 3-ah Vote nei mi 54,655 an awm mek a. General Voter 54,227 – Mipa 26,530 leh Hmeichhia 27,697 leh Service voter 428, mipa vekte an ni a. Mipa voter aiin Hmeichhe voter 739-in an tam zawk a. Vote nei thar mi 1,653 an awm a, kum 80 chung lam vote nei mi 686 zingah kum 100 chuang mi 4 an awm mek bawk. Champhai District chhungah Polling Station 84 awm mekin, Polling Station tinah voter 651 zel awm anga chhut a ni a. MLA Constituency zingah 24-Champhai South A/C-ah voter 19,774 awmin, a tam ber a. 23-Champhai North-ah voter 19,392 leh 25-E.Tuipui A/C-ah voter 15,489 awmin, an dawt a ni.
Comments are closed.