KUMPUI LINGLETA CHHUNGKAW TAM TAKTE THAWHRAH ENGMAHLO MAIAH CHANG

0

Get real time updates directly on you device, subscribe now.

Kar kalta Zirtawp zan atanga Ai ruah surin Champhai District hmun hrang hrangah Buh leh bal a ti chhe nasa hle a. Ruahsur nasa leh tui tam hian sangha dil nei a tihbuai leh an sangha khawi chhuak hriat tur a awm nual bawk.
Ai ruah sur hian nimin lamah ziaawm lam pan deuh mah se, tlai lam thleng khan ruah hi a la sur zui a, tui chim chin erawh chuan hniam lam a pan rih thung.
Champhai zawla buh luchuh vanglai tak, ruah surin a tih buai avang hian Loneitu thenkhat buh zai tawhte buh phal chu tuiin a chim nasa hle a. Heng buh phalte hi a then Silpouline hmangin khuh hul mah se, Silpouline nena tuiin a chim avang te, a tui hul lama an seng te pawh tuiin a chiah huh rei tawh avangin Buh thenkhat chu a tiak hman a, loh theih lohna avangin nimin lamah buh vuate pawh an awm a ni. Buh phal tuiin a chimte hi a til nasa hle a, a tiak te a awm avangin an beisei zat an thar pha lo nasa dawn hle tih loneitute chuan an sawi a. Sangha Dil eng emaw zat tui lian hian a chim bawk a; kawng thenkhat chu lirthei te chi tana tlan theih loh khawpin tuiin a chim bawk.
Champhai zawl bakah hian Tuithoh kama Lo nei Vapar khua chhungkaw 18-te buh chu tuiin a chim vek a. Hruaikawn ram chhung Tiau leh Kurung Zaua chhungkaw 8 te buh tuiin a chim bawk a. Bulfekzawl Tiau kama chhungkaw 13 leilet Buh tin 3000 chuang thar chhuak tura an inbeisei pawh Tiau Tui lianin a chim vek bawk.
Bungzung ram chhunga Tui aw leh Tuipui inpawhna laia Chhungkaw 9-in Zikhlum, Alu, Parbawr leh Antam an chinna hmun Hectare 3 vela zau chu tuiin a chim pil vek bakah, chhungkaw 1 buh an la seng zawh lohte Tuipui lui lianin a la vek bawk.
Nimin zing khan Champhai District thuneitute chuan Champhai Bawrsap Maria CT Zuali hovin Champhai zawla tui lianin buh a tih chhiat te a hmunah kalin an enfiah a. DC chuan tuilian vanga harsatna tawk loneitute leh Sangha khawitute chu a tuarpui thu sawiin, State Disaster Response Fund kaltlangin sawrkar dan dinglai anga tanpuina pek tum a nih thu a sawi a. Champhai Bawrsap Maria CT Zuali chuan van ruahtui tla bawk mah se, leilet phai zawl hnar leh a chheh vela sumdawnna kudam sak leh lirthei dahna siamte chuan eng emaw chenah harsatna thui tak a thlen phah tih a sawi.
Hetih lai hian Agricuture Dept Champhai chhinchhiah danin kum 12 chhunga November thlaa ruahtui tlak tam ber chu Kum 2012 kha niin, ruahtui 188.45 mm a tla a. Kumin November thlaah m Zirtawpni kal ta atanga Pathianni thleng, ni thum chhung lekin 113.9 a tla a ni.
Champhai zawla loneitute chuan Ai ruah hi kum tinin sur thin mah se, kumin anga ruahtui tlak tam hi an la hriat ngai loh thu an sawi ve bawk.

Leave A Reply

This site uses Akismet to reduce spam. Learn how your comment data is processed.

This website uses cookies to improve your experience. We'll assume you're ok with this, but you can opt-out if you wish. Accept Read More