Lamliana Fimkhur Thla

Get real time updates directly on you device, subscribe now.

Mizoram pumah Thla khat awh tur, ‘Lamliana Fimkhur Thla’ – Road Safety Month hman tan a ni a. Aizawla a hawnnaah chuan Transport Minister, TJ Lalnuntluanga chuan Road Safety Month chhungin harsatna nei leh puih ngaite puihna tur, Help and Guidance Desk, Vanapa Hall kawtah buatsaih a nih tur thu a sawi a, lirthei khalh dan turah mipui ten Sawrkarin dan zawm chu an tih tur a ni a, dan zawm that a nih phawt chuan lirthei chetsualna a tlem phah ngei ang, a ti.
Champhai-ah chuan DC Conference Hall-ah nimin chawhnu dar 1:00 khan, Addl. DC, R.Lalnghakliana, District Road Safety Committee Chairman chuan Khuallian niin, nimin atanga hman tan tak Road Safety Month 2021 Champhai District chu a hawng a. Khuallian chuan sawrkarin inkaihhruaina dan a siamte chu kan zavaia tana himna tur a nih avangin mipui te’n tha taka zawm hi kan mawhphurhna a ni, a ti a. Traffic rules chu dan zawmlote tan chauha duan a ni lo va, lirtheia chuangte leh ke a kal mipui himna tura duan nih thu sawiin, dan zawm kawngah tan lak thar a tul thu a sawi a. Traffic Police leh dan kengkawhtute chu tan la sauh sauh turin a chah bawk.
Hawnna hun hi R.Lalnunkimi, District Transport Officer chuan a kaihruai a. Khawvela lirtheia chetsualna thleng za zela 6 chu India ram thleng a ni, a ti a. Road Safety Month hman chhungin Enforcement leh MVI lam te’n khauh lehzualin endik hna an kalpui ang a, dan zawm lote dapchhuakin hremna an pe dawn a, lirthei khalhtu leh mipui hnenah zirtirna a theih ang a zau leh remchang ang zela kalpui tum a ni tih a sawi bawk.
Rex Zarzoliana Vanchhawng, SP Champhai chuan, Lirthei chetsualna tam ber chu rui chunga lirthei khalh leh tlan chak luat vangte a nih thu a sawi a. Lirthei chetsualna avanga thihna tam ber chu ke hnih nei lirtheia chuangte an nih thu sawiin, himna tura tangkaite zawm leh helmet khum ngaipawimawh chunga lirthei khalh chu tikmakmawha neih a tul tih a sawi a. Hmanhmawh luat vangin lirthei chetsualna tam tak a thleng thin tih sawiin, kan thlen tumna hmunte him taka kan thlen dawn phawt chuan thlen tlai deuh pawh kan inhuam a ngai a ni, a ti bawk.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More