Lawrkhawm

𝗛𝗿𝗶 𝗸𝗮𝗶 𝗲𝗻𝗸𝗮𝘄𝗹 𝘁𝘂𝗿𝗶𝗻
Nl. Lalrempuii d/o C. Ramrinliana, Champhai Bethel veng chu Zirtawpni khan ZMC-ah Covid-ah hri kai damlo enkawl turin a inpe tih thu kan dawng.

𝗛𝗿𝗶 𝗸𝗮𝗶 𝗵𝗺𝘂𝗵 𝗯𝗲𝗹𝗵
Zirtawpni khan Champhaiah hri kai mi 1 hmuhchhuah belh leh a ni. Hri kai hmuhchhuah hi State pawn, Karimganj atanga May ni 3-a Champhai rawn thleng, Samuels Inn, Tlangsam Winery-a khung hran lai a ni a, Kum 34 mi niin, taksaa natna lang chhuak a ni. Ningani a hri kai mi 5 hmuh chhuah tarlan bakah Ningani khan hri kai mi 1 hmuhchhuah belh a ni bawk a, hri kai hmuhchhuah hi mipa kum 28 mi, Assam atanga rawn haw a ni.
Heti hian Champhai District chhungah hri kai mi 168 hmuh chhuah a ni tawh a, mi 47 Covid Care Centre-ah enkawl mek an ni a, an zinga 14 hi naupang an ni.

𝗖𝗖𝗖𝗖 𝗮𝘁𝗮𝗻 𝗽𝘂𝗮𝗻𝗴
Champhai District Magsitrate-in Community Covid Care Centre atana a lo puan tawh, Zokhawthar Tourist Lodge chu remchan lohna avangin Zokhawthar HSS building chu CCCC atana hman turin niminpiah khan thupek a chhuah.
Community Covid Care Centre sawn a nihna chhan sawiin District Magistrate Maria CT Zuali chuan, CCCC atana lo puan hmasak tawh Zokhawthar Tourist Lodge-a awm man chu zan khatah Rs 600 a ngai a. CCCC a awmte hian awm man leh senso an intum vek a ngaih dawn avangin chhungkaw rethei tak tak te tan Tourist Lodge-a awm ngaihna a awm loh avangin sawn a nih thu a sawi.

𝗕𝗮𝘄𝗿𝗵𝘀𝗮𝗽 𝗶𝗻 𝗡.𝗗𝗶𝗹𝘁𝗹𝗮𝗻𝗴 𝘁𝗹𝗮𝘄𝗵
Niminpiah khan Champhai Bawrhsap Maria CT Zuali chuan North Diltlang khua tlawhin, North Diltlang khuaa dil, khelmuala leh tawh chu Dila siam leh dan tur a hmunah a enfiah a. BADP hnuaia kawng laih tawh, laih chhunzawm dan tur a enfiah bawk a. Covid 19 hri leng laka inkaihhruaina sawrkarin a siam dan zawm lote hrem dan tur khawtlang hruaitute a hrilh bawk a. Bawrhsap hi Project Director DRDA R.Lalnghakliana’n a tawiawm a, Hnahlan khuaa Grape huan thenkhat an tlawh bawk.

𝗗𝗖𝗣𝗨 𝘁𝗲𝗻 𝗮𝗻 𝗽𝗲
Champhai District chhungah hri kai naupang 14 awmin, niminpiah khan District Child Protection Unit, Champhai chuan an taksa tana eitur tha chi hrang hrang an pe a. District Covid Care Centre, Champhaia naupang 13 awmte leh Zokhawthar 4C-a enkawl mek naupang 1 ta tur chu CMO Dr. R.Lianmawia’n a lo dawn sak a. DCPU Champhai hian niminpiah vek khan Champhai Kahrawt veng naupang pahnihte chu Diaper an pe bawk.