𝗟𝗔𝗪𝗥𝗞𝗛𝗔𝗪𝗠

𝗔𝗦𝗙 𝘃𝗮𝗻𝗴𝗮 𝘃𝗮𝘄𝗸 𝘁𝗵𝗶 136 𝘁𝗹𝗶𝗻𝗴 𝘁𝗮𝘄𝗵
African Swine Fever (ASF) vanga Zokhawthara Vawk thi chu 136 a tling tawh. Dr. Lalrinhlui Veterinary Officer hnen atanga thu dawn danin, nimin khan Zokhawtharah African Swine Fever vangin vawk 13 a thih belh a. AH & Vety Dept chhin-chhiah danin ASF Zokhawthara a len atanga nimin thleng khan vawk hri vanga vawk thi hi 136 a tling tawh a ni.

𝗠𝗟𝗔 𝗶𝗻 𝘁𝗮𝗻𝗽𝘂𝗶
Champhai South Bialtu MLA, TJ Lalnuntluanga’n a bial chhunga inkharkhip avanga chhuanchham awmte tana buhfai a pek chu nimin khan sem chhuah a ni.
Nimin khan Champhai South bial chhunga veng 20 VLTF te hnenah leh Home 3 Metakhen, Genesaret Gospel Home leh Imanuel Rescue Home-ah te buhfai Bag 160 sem chhuah a ni a. Bialtu MLA aiawh hian Champhai South MNF Block hruaitute chuan hmun hrang hrangah inthen darhin an sem chhuak a. Heng buhfaite hi VLTF te’n an huamchhunga inkharkhip avanga chhuanchhamte hnenah an sem chhuak leh dawn a ni. Champhai South bialtu MLA, TJ Lalnuntluanga hian kar hmasa khan a bial chhungah hian buhfai bag 20 a lo sem chhuak tawh bawk.

𝗭𝗼𝗸𝗵𝗮𝘄𝘁𝗵𝗮𝗿𝗮𝗵 𝗱𝗮𝗻 𝗯𝗮𝘄𝗵𝗰𝗵𝗵𝗶𝗮 𝗺𝗶 5 𝗺𝗮𝗻
Nimin khan Champhai khawpui chhunga Covid-19 hripui leng vanga inkhuahkhirhna dan bawhchhia man an awm loh laiin, Zokhawthar, tlawhpawh phal lohna hmuna kal, mi 5 man an ni a; Rs. 1000 theuh chawitir an ni a. Nikum October ni 26 atanga nimin thlenga Champhai district chhunga dan bawhchhia man hi mi 1946 tling tawhin, an pawisa chawi hi a vaiin Rs. 2,96,700 a tling tawh bawk.

𝗧𝗵𝘂𝗽𝗲𝗸 𝗸𝗵𝗮𝘂𝗵 𝗹𝗲𝗵𝘇𝘂𝗮𝗹
Zokhawthar khua chu District Magistrate in luhchhuah phal lohna hmun, containment area-a a puan mek a ni a. Nimin khan District Magistrate Maria CT Zuali chuan, he thupek chhunzawm nan hian thupek a chhuah thar belh leh a.
Thupeka tarlan dan chuan, he khua chhuahsan leh lut tur reng rengin Champhai SDO (S) Lalnunfela Chawngthu, Ph. No. 9856055680 hrilh hmasak tur a ni a. Hrilh lova lut leh chhuak an awm chuan action lak a ni ang.
District dang VLTF/LLTF ten phalna an pe a nih pawhin Khankawn Police Checkgate-ah an phalna kengin an in report ngei tur a ni a. SDO(S)/SDM rehtihna leh ruahman dan ang chauhin an che zui thei ang. Hetihlai hian, Champhai SDO(S) hian, Champhai Kanan venga khung hran tura VLTF ten an hrilh, thu diklo sawi leh tawngkam neih zui chungchangah zilhna leh hriattirna a pe zui bawk.