DC charge la
Champhai District Bawrhsap Maria CT Zuali chu nimin atanga karleh Thawhtanni thleng khian hna pawimawh avangin Aizawlah hun
a hmang dawn a. Hemi hun chhunga hian Addl. DC Henry C.Lalrawnkima chuan DC
mawhphurhna hi a la rih ang.
DCSO insawn dawn
Nilaini khan FCS&CA Deptt. hnuaia DCSO te chu siksawi an ni a, Champhai DCSO Spencer
Vanlalchhuanga chu DCSO Lawngtlai hna chelh tura sawn a ni a. Champhai DCSO hna chelh tur hian Lalrinsanga, Asst. Director chu ruat a ni bawk. An hna chelh tur hi ni 20 chhunga zawm fel tura tih an ni bawk.
Chetsualna thleng
Nizan hmasa khan thirsakawra chetsualna thlengah mipa naupang kum 14 mi a thi.
Thudawnna sawi danin, nizan hmasa dar 8:00 vel khan Champhai Bethel Veng, Chhura hmuna kawng chhuk laiah Isak Pauzahnuna, kum 14, Champhai Vengthar leh a thiante chuan thirsakawr an khalh a, kawng chhuk laiah a hnunga tlan a thianpa chuan a thirsakawr khalh lai thunun zo lovin Isak Pauzahnuna hi a su a, Isaka hi tluin kawng sira
lungrem-ah a lu a sawh a.
Champhai District Hospital panpui nghal ni mah se, a hliam tuar lo hian nizan hmasa dar 11:00 vel khan a boral a. A ruang hi lumen a nih hnuin nimin khan Champhai Vengthar thlanmualah vuiliam a ni.
Mi 1462 man tling tawh
Nimin khan Champhaiah inkhuahkhirhna dan bawhchhia mi 45 man an ni a, an pawisa chawi hi Cheng 4500 a ni. Nikum October ni 26 atanga Covid-19 No Tolerance Fortnight hman tan atanga nimin thleng khan dan bawhchhia mi 1462 man an ni tawh a, an pawisa chawi tlingkhawm hi a vaiin Cheng
1,99,300 a tling tawh a ni.
Hri kai enkawl dam
Nimin chawhma khan Covid-19 hri kai hmeichhia, kum 28 mi chuan dam takin Covid Care Centre, Champhai a chhuahsan a; heti hian Thawhtanni-a hri kai enkawl dam mi pakhat nen tunkarah hri kai pahnih enkawl dam awm tawh.
Tun din hmunah Champhai district-a hri kai enkawl mi 109 chu enkawl dam an ni tawh. Champhai District mi hri kai hmuh chhuah tawh zawng zawng hi mi 115 awmin,
Champhai district-a hri kai hmuh chhuah enkawl lai hi mi paruk an la awm a. Tunah hian CCC Champhai-ah mi panga, Champhai
district case mi pathum leh remchan zawkna avanga enkawl Saitual district case mi pahnih awm mekin, Champhai district case mi pahnih
ZMC-a thawn thlak an awm
Comments are closed.