LEICHI INDAIH LOHNA AVANGIN HARSATNA TAWK

0

Get real time updates directly on you device, subscribe now.

Buh leh thlai chin hunlaiin Champhai leh Khawzawl District-ah leichi indaih lohna a thleng thin tih Champhai District Agriculture Officer chuan a sawi.
Champhai District Agriculture Department hi Champhai leh Khawzawl District-a leichi pe chhuaktu an ni a. An hnuaiah hian leichi dealer mi 4 awmin, dealer pakhatah allotment bag 1200-1400 chu pek chhuah thin a ni a. Hei hian thlai chin hunlai, rabi leh kharif season-ah leichi hi loneitu, a bikin thlai chingtute leh tlangram loneihnaah an hman nasat avangin, indaih lohna a thleng thin tih DAO B.Lalhmuchhuaka chuan a sawi a.
Leichi mamawh zat hi kum tin a san zel rualin, thlai chin hun ni lovah chuan indaihlohna hi a thleng tam lo, a ti a. Tunah hian Champhai District Agriculture Department chuan leichi pangngai hi kawl an nei lo va. July thla allotment pawh siamfel tawh niin, rel kawng a tlang that theih chuan rawn phurh thlen thuai a beiseiawm tih an sawi.
Leichi an pek chhuah kawngah hian loneitute chanpual chu Myanmar-a tawlh luh tum an awm thin a. Hei vang hian Farmers Card hmang bakin leichi chu an pek chhuah tawh ngai loh thu an sawi bawk a. Myanmar-a leichi tawlhluh hi Research and Analysis Wing chuan ruihhlo, Methamphetamine siam nan an hmang niin an sawi ve bawk.
Champhaiah hian nikum khan leichi bag 5315 an man a, court thupek angin loneitute hnenah hralh zawh tawh a ni a. Dan lova leichi an man tam ber hi Mizoram state pawn atanga rawn kalte a ni tlangpui. DAO chuan leichi-ah hian Urea chauh hmang lovin NPK (Nitrogen, Phosphorous & Potassium) fertlizer chu thlaiin a ngeih zawk avangin loneitu ten hmang uar se a duh tih a sawi.

Leave A Reply

This site uses Akismet to reduce spam. Learn how your comment data is processed.

This website uses cookies to improve your experience. We'll assume you're ok with this, but you can opt-out if you wish. Accept Read More