Irrigation & Water Resources Department hmalaknaa buatsaih, National Hydrology Project (NHP) kaltlanga leihnuaia tui awm dan leh verhchhuah chungchang inzirtirna chu nimin zing khan Thingmaldin M.I Project hmunah District Bawrhsap Maria CT Zuali chuan a hawng.
Champhai District Bawrhsap Maria CT Zuali chuan National Hydrology Project kaltlanga mithiamte kaihhruai leiverh chungchang zirchianna Champhai leilet zawla kalpui a ni tur chu lawmawm a tih thu a sawi a. Ei leh in, nitin mamawh thartu loneitute chu indah hniam mai lova inring tawk taka awm tur leh, hmasawn duhna leh intuaithar reng duhna nei turin a fuih a. Mahni duh dan anga kal mai lova mithiamte rawn chunga hma la thiam turin a chah a. Leihnuaia tui awmin lei pawnlang awm dan leh nihphung thui tak a hril thu sawiin, leihnuai tui tlingte a kiam zel chuan lei a charin a ro phah hle thei a, nakin lawka harsatna kan tawh loh nan duhna lai laia leiverh ngawt hi kan bansan a tul a ni, a ti bawk.
Bawrhsap chuan loneitute chu buhseng zawha thlasik thlai chin theih 12 awmte ching uar deuh deuh turin a fuih a. Mihring tha chu a tlem avangin khawl hmanga thawk tura insiamrem chhoh zel a ngai a, hamthatna dawng turin cooperative society mumal tak din zel a tul thu a sawi a. Department hotu leh mithiam, zirna in tha tak tak atanga degree sang tak tak neite chu, zirlaibu leh a taka thil awm dan a dang daih tih hrilhin, mahni awmhmun atanga thawh nen a inang lo a, loneitute puih duhna leh hriatthiamna tak tak nen thawk chhuak thin turin a chah bawk.
He huna zirtirna petu Tapash Saraswati, Senior Consultant (Hydrogeologist) chuan, leihnuaia tui tling chu zo mai thei a nih avangin a pawng a taka leiverh loin lei pawnlanga tui awmte tangkai taka hman hnuah indaih lohnate a awm a nih chuan renchem tak chunga hman chauh tur a nih thu a sawi a.
Leihnuai tui awm chu tling khawm leh hman theih tura hun peka awltir chang neih a tul, a ti. Duh duhna laia leiverh ngawt chuan nghawng thalo zawk a thlen theih avangin fimkhur taka mithiamte rawn chunga leiverh a tul thu a sawi a. Tlangram Mizoramah chuan leilung chanchin hriatfiah mai a har avangin zirchian hmasak a tul thu leh, tubewell design tha tak neih a ngai tih a sawi a. A tlangpuiin leihnuai tui awm verhchhuah hman dan tur bituk pela hman a nih thin avangin mamawh ang tawk chauha hman a nih theih nan fimkhur taka kalpui a tul tih a sawi bawk. Leihnuaia tui tling zirchian hmasak leh verhchhuah chungchang hi a thu-in November ni 8, 2021 atang khan zitir tan a ni a.
Hmalakna hmasa tur, pilot site-a thlan Champhaiah hian nimin atang khan Sr. Consultant (Hydrogeologist) hovin a taka tihchhinna (practical) hmangin survey neih tan a ni a, hlawhtling taka leihnuai tui lakchhuah a nih theih nan zirchianna leh ruahmanna felfai tak nena survey kalpui tura ruahmanna siam a ni.
Thingmaldin zau chhunga leihnuai tui verhchhuahna tura hmun ruat 16 awmte chu Resistivity meter hmangin Geophysical survey neih hmasak a ni ang a, result a that chuan leiverh leh tul dangte chu a tahtawla buaipui leh tur a ni ang.
Comments are closed.