LEITHUMAH CHENNA IN KANG RAL

Get real time updates directly on you device, subscribe now.

Nizan hmasa dar 9:40 vel khan Leithum khua-a cheng Pi Zalawmpuii in chu bungrua chuh hman lovin a kangral.
Nizan khan In neitunu ber leh a fapa leh a monu te chu mu turin an inbuatsaih a, an fapa hian thil kang rim a hriat thu a nu a hrilh hnu ah kang a awm leh awm loh an enkual nghal a, kang chhuak awm an hmuh loh avangin an thenawmte meichhem rim vel ni-ah ngaiin ngaihtha takin an mu zui a. Zan dar 10 pelh hret khan an nu ber mu chu meikang sa in a ur harh a, an mut pindan chu a lo kang nasa tan tawh hle a, sitting room a mu an fapa chu kaitho in pawnah an tlan chhuak nghal a, thenawm khawveng te rawn pungkhawm nghalin in kang hi thelh tum a beih nghal ni mah se, kang mei hi a nasat tawh avangin thelhmih theih a ni ta lo a ni.
Kangmei hi an mut hnu zan dar 9:40 vel atang khan an bedroom atanga kang tan ni-a rin a ni a, anmahni hian mei chhem engmah an neih loh avangin current kalsual vanga kang a nih rin a ni a. In a kan lai hian nu ber leh a fapa leh a monu te chauh inah an awm a, a fapa pakhat zawk chu zaipawl conductor a nih avangin hla zira a chhuah lai a ni a, a tupa pawh a pu te bula a awm lai a ni bawk. Kangmei chhuakah hian thi leh hliam an awm lo va, bungrua erawh engmah chuh hman lovin a kangral vek a.
An in hi Assam type niin chhungkaw member 5 an cheng a. In neitu fapa hi MNF Unit sum kawl tu a ni a, Unit sum an kawl ang ang leh anmahni pawisa kawl bakah Self Help Group lehkha pawimawh tak tak te a kangral vek a, bungraw kangral hlut zawng hi ₹ Nuai 5 hu vela chhut a ni.
Nizan hmasa vek khan BDO leh Dungtlang Police te bakah Vanzau Presbyterian Kohhran bialtu Pastor te chu kangmei chhuahna hmunah hian an thleng ve nghal a, kangmei tuar te tan tanpuina sumfai an hlan hlawm a ni. Nizan hmasa dar 12 vel khan Leithum NGO hrang hrangte chu chhiat tawh chungchangah inrawn khawm nghalin khawtlanga in kang senghawi leh in sak that hnatlang neih ni se tia an rel angin, nimin khan Leithum khawtlang chuan hnatlangin in kang seng hawi leh in thar sak hnatlang an nei zui nghal a. Hnatlang hian mi 140 chuang an thawk chhuak a, Leithum khua bakah an khaw thenawm atangin hnatlang hian an thawk chhuak bawk a. Bialtu MLA chuan hnatlang te thingpui lum nan ₹ 3000 a pe a, in sakna tur rangva bandle 4 a pe bawk.
In hi Assam type, Semi pucca a sak niin, a dung ft. 36 leh a vang ft. 24 a sak a ni a. A chhuatah thingphel hman a ni a, a bangah tile hman a ni a, a chungah rangva chih a ni ang.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More