Nimin zing khan Champhai Chhungte daiah lirthei a chesual a, lirthei khalhtu leh neitu ni bawk TC Lalhuapzauva, Champhai Vengthlang chu a hmunah a boral.
Champhai Police Station atanga thu dawn danin, lirthei chesuala nunna chan ta TC Lalhuapzauva kum 53, Champhai Vengthlang hi nimin zing dar 5:00 vel khan Rulchawm khuaa awm a nupui te hruai turin an in atangin amahin a chhuak a.
Chhungte daiah hian chesualin kawng thlang lam khamah Metre 100 vela thui a lum a ni. Lirthei chetsual hun tak hi hriat theih ni lo mah se, Champhai atanga a chhuah hun leh a chetsualna hmun hlat zawng chhutin, zing Dar 5:30 bawr vela chesual a nih an rin thu Champhai Police-te chuan an sawi.
Chhungte VCP Ralthanga sawi danin, lirthei chesual hi a tirah hriat nghal a ni lo va, tukthuan eikham dar 10:15 velah feh kal turin an hmu a, anni hian Chhungte khawtlang leh Champhai Police-te an hrilh nghal a ni.
A hmun thleng hmasate sawi danin lirthei hi a khawl a lo la nung a, lirthei neitu leh khalhtu ni bawk hi a lo thi fel tawh thung a ni. He chetsualna thlenna hmun hi kham a nih avangin ruang lak chhuah nghal mai theih a ni lo va. Chhungte khawtlang inpunkhawm leh chetsualna hmuna thleng hmasa te’n Chhun dar 12 vel khan an lachhuak a ni.
TC Lalhuapzauva hian a lu leh a nakah hliam tuarin, a nakruh a tliak bawk ni-a hriat a ni a, nimin khan a ruang hi Champhai District Hospital-ah postmortem nghal niin, nimin tlai dar 5 khan Vengthlang thlanmualah vuiliam nghal a ni.
TC Lalhuapzauva hi Champhai Venglai Secondary School Headmaster niin, Champhai Vengthlang Presbyterian Kohhrana Tualchhung Upa a niin hun rei tak Champhai Vengthlang Branch YMA hruaitu hna a lo chelh tawh bawk a ni.
Comments are closed.