Khawzawl District Rabung khaw daia lirthei chesualah Aiduzawl khua mi 6 an thi.
Lirthei chetsual Mahindra Pickup niin Aiduzawl atanga Rabung khuaa mitthi ral tura kal an ni. Khawzawl Police-te sawi danin lirtheiah hian mi 19 an chuang a, nimin chawhma dar 10:10 khan Rabung khaw luh dawn, Mel chanve vela hla kawng chhuka an tlan laiin kawng thlang lamah tlan liamin Singzawl Road-ah an tla thla a. Lirthei chetsual chhan hi a steering a fail vang nia hriat a ni a, an tlakna hi Feet 30 vela sang a ni.
Lirtheu chetsualna hmunah hian mi 4 – Pu Vanlaldinga, Pu Lalsawta, Pi Zahliri, Pi Lalruatkimi te an boral nghal a. Rabung PHC-ah a hliam tuar lovin Pi Zonunsangi a boral zui ve leh a. Nimin tlai lam dar 3:20 vel khan Pi
Lalbuatsaihi chu a hliam tuar lovin Rabung PHC-ah a thi ve leh a ni. Hliam tuar zinga a na zual mi 8-te chu enkawlna tha zawk dawng turin nimin khan Aizawl panpui nghal an ni a; Rabung PHC-ah mi 3 te la enkawl mek an ni.
Khawzawl District Bawrhsap CC Lalchhuangkima chuan nimin khan Rabungah kalin he chetsualna thleng vanga mi 6 boral te puana a tuam bakah Rs. 3000 theuhin a ral a, hliam tuar 11 te chu Rs. 1000 theuhin a kan nghal bawk a ni.
Khawzawl Sub Headquarters YMA hruaitute pawhin Aiduzawl khua pan nghalin chhiat tawk zawng zawng te puana tuam in Rs 1000 theuh an ral nghal bawkah Rabung khua inkang tuar hnenah Rs 2000 in tanpuina an hlan nghal bawk a.
Lirthei chesuala nunna chante hi Aiduzawl khua vek niin nizan khan an ruang hi lumen a ni ang a, vawiinah vuiliam an ni ang.
Comments are closed.