YMA Sub-Hqrs. Champhai kuta Mizoram sawrkar, Transport Department-in dan ang taka inremna siampuia Ambulance leh Recovery Van a hawhtir Pathian hnena hlanna leh lawmthu sawina hun SYMA Hall, Tlangrawt, Champhaia buatsaih chu
nimin chawhnu khan Transport Minister TJ Lalnuntluanga chuan a hmanpui.
Transport Minister TJ Lalnuntluanga chuan, hun rei tawh tak atanga Champhai District mamawh leh indaih lohnate phuhruk a nih theihna tura pawimawh tak, Ambulance leh Recovery Van te Transport Department leh YMA Sub-Hqrs. tangkawpin inremna tha tak an siam avanga Champhaia dah a ni thei chu lawmawm a tih thu a sawi a. Mamawhnate a phuhruk ngei a beisei thu sawiin, dan anga a tul angte bawhzuia hmalak a ngaih avanga hun a duh rei deuh tak thu leh dan ang thlapa inhlan fel a ni thei chu lawmawm a tih thu a sawi bawk.
TJ Lalnuntluanga chuan dik tak leh felfai taka a tahtawla hmasawnna kalpui a tul thu sawiin, a enkawl Department Environment Forest & Climate Change hnuaiah Champhaiah Conservator of Forest (CF) post dah a nih tur thu leh, Law & Judicial Department kaltlangin Champhai Judicial District thar leh District Court sakna turte High Court in a pawmpui tawh tih a sawi bakah, District Transport Office thar sak thuai tum a nih thu a tarlang bawk.
YMA Sub-Hqrs. Champhai hnena Ambulance leh Recovery Van hawh tir chu mipui ten an chhawr tangkai ngei a duhsak thu sawiin, YMA chu tanpui ngaite tanpuitu leh khawngaih rawngbawl kawnga penchhuak a nih thu sawiin, Mizo hnam a awm chhung chuan YMA chu a dai tawh dawn lo a ni, a ti a.
YMA hruaitute chu midangte tana malsawmna ni tura thalaite zirtir leh an rilru puthmang siam dik kawngah tan la sauh sauh turin a chah a. Ambulance leh Recovery Van chu harsa zawkte tanpui kawnga tangkai taka hmang turin duhsakna a hlan a ni.
He hun hi F.Lalrinmuana, President, SYMA Champhai chuan a kaihhruai a. Pastor K. Lianmunga’n Ambulance leh Recovery Van Pathian hnena hlanna hun a hmang a. R. Lallawmzuala, Secretary, SYMA Champhaiin lawmthu sawiin hun a khar a ni.
Comments are closed.