LITERATURE FEST 2022 HMANG

Get real time updates directly on you device, subscribe now.

Govt Champhai College-in Literature Fest 2022 an hman chu Champhai Bawrhsap James Lalrinchhana’n khuallian niin a hmanpui.

Govt Champhai College-a English Dept, Mizo Dept leh Literature Club buatsaih Literature Fest 2022 hi Champhai Cable Network (CCN) Sponsore a ni a. Nimin chawhma dar 10:00 khan he hun hmanpuitu R.Lalnunkimi, DUDO chuan Literature Club-te siam Little Library a hawng a ni. Litera-
ture Fest hmanpuitu Champhai Bawrhsap James Lalrinchhana chuan, zirlaite chu Zoram hma thlir an nih thu sawiin, Literature Fest buatsaih a ni chu an tana thil tangkai leh hmasawnna thlentu a nih ngei a beisei thu a sawi a. Kan ram a than zel theihna turin Literature kan hlam chhiah thiang lo tih sawiin, tun aia nasaa lehkha chhiar uar lehzual turin zirlaite a chah bawk. Mihring thil hmuhchhuah zinga ropui ber pakhat chu ziaka thil dah theihna a nih thu sawiin, chhuan kal zelah inhlan chhawngin vawiin hi kan thleng ta a ni, a ti a. Ziak chuan ram leh zia, a nun dan zawng zawng mumal taka pho chhuaktu a ni a. Thangthar zingah kan vantlang nun leh kan hnam history rawn chhui leh te pawhin ziak hi an rawn en zel dawn a ni, a ti.

Bawrhsap chuan thiamna duha literature khawvel luh chilh te’n hlawhtlinna an chan thin thu sawiin, Lehkhabute hi hlutna chang kan hriat chuan kan nuna hna tangkai a thawk zel dawn a ni, ti bawk. Mahni nihna lan chhuah tir kawngah Mizote hian hnamdang kan tluk tawk lo thin tih sawiin, eng thil pawh ti ila, kan kawng zawh hrang hrangah khawvel hi kan ngamin kan hneh tur a ni, a ti a. Khawvel hneh turin kan tha tawk a, kan thei ve a ni tih hi kan hriat reng a tul a ni, a ti bawk. Literature Fest 2022-ah hian Mizo zinga lehkhabu ziaktu langsar Lalrammawia Ngente chu sawm niin, kawmna hun
hman a ni a. Zirlai te’n zawhna an zawt a ni.

Vawiinah hun hman chhunzawm leh a ni ang a, Hla phuah thiam T.Lalnunzama leh Ramengmawia te zirlai naupangte hmaah kawm an ni dawn a ni. Essay inziah siak leh hla inphuahsiak a ni bawk a, nimin khan lawmman sem a ni a. Essay inziahsiak, English-ah R.Lalrinmawii III Sem BA chu pakhatna a ni a, Amos Lalhruaizela III Sem BA chu pahnihna niin, Bernard Kamliansanga V Sem BA chu pathumna a ni a, Mizo-ah Lalremruata V Sem BA chu pakhatna a ni a, Vunglamluni V sem BA chu pahnihna niin Laldinpuii V Sem BA chu pathumna a ni bawk. Hla inphuahsiak English-ah Samuel Zothanmawia III Sem BA chu pakhatna a ni a, Vanlalzawma III Sem BA chu pahnihna niin, Amos Lalhruaizela III Sem BA chu pathumna a ni. Mizo-ah Maranatha Lalchawisanga III Sem BA chu pakhatna niin, Lallawmsangzela III Sem BA chu pahnihna a ni a, Laldikzuala V Sem BA chu pathumna a ni.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More