Champhai District Bawrhsap Maria CT Zuali chuan nimin khan Hnahlan leh N. Diltlang khuate tlawhin, Hnahlan Grape Growers Society, N. Diltlang khaw panna PMGSY kawng siamin tuilakna a tih chhiat te, Apple chinna hmun tura ruahmante leh N.Diltlang khuaa zirna in te a tlawh.
Hnahlan khuaa Grape chingte a kawmnaah Bawrhsap chuan, sawrkar hmalakna enkawl leh vil zui kawngah mahni intodelh thei tura ngaihtuahna sen a tul tih a sawi a. Mahni kut ke a ding thei tura hmalam pan tum tlat turin Society member-te a fuih a.
Sawrkar-ah innghat vek lova intodelh thei tura society chak tak nih tum turin a chah a. Thlai thar chhuah leh sawngbawl kawngah a leitu turte hip thei tur leh an zawng chhang theih nana cheibawl thiam a tul tih a sawi bawk.
Horticulture Department-in FOCUS Project kaltlanga Grape huan tuaihnumna tura Grape kung awmsa leh upa tawhte cheihnum leh enkawl thatna tur fund hmanga hmalak dan tur te; Nutrients management hmanga leitha vur, damdawi leh tul dang huam chin kalpui dan turte sawiho a ni bawk a. Society hruaitute chuan leirem rapa mahni kut kea ding thei tur leh intodelh tura hmalak zel an tum thu an sawi a ni.
Hemi hnu hian DC Office kaltlanga N.Diltlang Primary School choka sak mek leh Middle School-te a tlawh a. Zirtirtute chu zirlaite hmakhua ngaia thahnemngai taka thawk turin a fuih a. Zirlai mai bakah zirtirna dangte kalpui a, zirlai te’n Sikul kal an chak ngawih ngawih theihna tura boruak nuam leh zirthiamna hmuna siam tum turin a chah bawk a. Zirlai naupangte chu faina nunpui tur leh tum nei rana theihtawp chhuaha lehkha zir turin a chah nghal bawk.
Bawrhsap hian N.Diltlang khaw panna PMGSY kawng siamin Zotui tuilakna a tih chhiat pawh tlawhin, Jal Jeevan Mission kaltlanga tuilakna tha zawk siam tura ruahmanna siam a nih thu a hrilh a. Hnahlan leh N.Diltlang VC te nen Apple chinna hmun tura ruahman ramte enhoin Official-te nen hmalak zel dan tur an sawiho nghal bawk.
Bawrhsap hi B.Lalzarzova, DHO; H.Lalhminghlua, Addl. DPC Samagra leh Department dang hotu ten an tawiawm a ni.
Comments are closed.