District Sanitation Task Force thukhawmin plastic polythene bag hman tlem leh bansan lama chak lehzuala hmalak a rel bawhzui nan leh, luidung nungcha la puitling lo zawrh enfiah tura din, Champhai District Enforcement Team chuan Inrinni tuk khan Champhai khawpui chhung Bazar hmun hrang hrangte an enfiah.
Joint Inspection Team hi team hnihah inthenin, DFO, DUDO leh BDO Champhai ten kaihhruaiin Champhai khawpui chhunga chawhmeh zawrhna Bazar-te an enfiah a ni. District Sanitation Task Force, Champhai District-in Plastic Waste Management Amendment Rules, 2021 duhdan anga vawi khat chauh hman tlak polythene plastic bag hman thin bansana, bag tawih ral thei non woven bag leh a dang, hriselna leh leilung tana him zawkte Champhai District-ah hman a nih theih nana hmalak nise a tih bawhzui nan, Bazara chawhmeh leh thil dang zawrh leh leitute chu polythene hman ti tlem chhoa bansan a tul thu leh a nghawng thalote hrilhfiah an ni a. Khawtlang hruaitute pawh mipui hnena zau zawka inzirtirna leh hriattirna siama hrilhfiah tura ngen an ni bawk.
Inrinni zing vek khan District Enforcement Team kaihhruaiin luidung nungcha la puitlinglo man leh zawrh enfiah a ni a. Chakai la puitlinglo 63, Rahsi veng Bazar-ah man niin, Murlen National Park chhung luia chhuah turin Vapara Wildlife Guard hnenah Inrinni vek khan hlan a ni.
Heng bakah hian DFO Champhai chuan Rahsi veng Bazarpuia zawrh lai Sakuh sarep khai 3, a vaiin 1 kg, Rs.900 hu a man bawk a. Sakuh hi nungcha humhalhna danah Schedule -IV hnuaiah dah a ni a, a tihlum leh zuartute chu kum 3 thleng lung in tan tir emaw, Rs 25,000 chawitir emaw, a pahniha hrem kawp theih a ni. Sakuh sa zuar leh petu ni a sawite chu DFO Office-a inlan tura hriattir an ni a, thubuai kalpui zui zel dan tur sawiho a ni ang.
Director of Fisheries atanga hriattirna dawn bawhzuiin District Fisheries Conservation Board Chairman, Maria CT Zuali, DC chuan District chhunga luidung nungcha la puitling lo leh ei tham loh man leh zawrh a nih lohna turin DFDO Champhai kaihhruai Champhai District Enforcement Team chu October ni 20, 2021 khan a din a. Member dangte chu FD & AFO, SDPO Champhai, DFO Champhai, Champhai Nature Conservancy (CNC) President, YMA Sub-Hqrs. President, Champhai te an ni a. Din a nih atangin kartin vawihnih (2) Champhai Town huam chhunga luidung nungcha zawrh chhuahna hmunte tlawhin, nungcha la puitling lo man leh zawrh chhuah a awm leh awm loh an endik a, a tul angin hma an la zui thin a ni.
Comments are closed.