LUNGAWILO MI 27 TE CHUNGCHANG NGAIHTUAH

Get real time updates directly on you device, subscribe now.

Champhai leh Zokhawthar inkar World Bank Road kawng laih chungchanga lungawilohna thlente ngaihtuahtu, Grievances Redressal Committee (GRC) chu nimin chawhnu dar 2:00 khan an Chairman, District Bawrhsap Maria CT Zuali hovin, lungawilohna thlente chinfel dan tur ngaihtuahin DC Conference Hall-ah an thukhawm.
Bawrhsap Maria CT Zuali chuan, kawng laihin harsatna a thlente leh an lungawilohna, thuneitute hnena thehluhte ngaihtuahna hunah inremna leh lungawina siam a nih theih nan inbiakna tluang tak neih a tul tih a sawi a. Hmasawnna hnathawh thenkhatin chhiatna thlen chang awm thin bawk mah se, hnathawktu company, a tuartute leh sawrkar thuneitute chuan a chinfel dan ngaihtuahin dan angin lungrual takin hma an la tlang thin tur a ni, a ti.
V.Lalruatliana, Special Land Acquisition Officer (SLAO) & Member Secretary, Grievances Redressal Committee chuan, zangnadawmna pek nan ram lak tur chinte zirchian thin a ni a, leivung paihna turte pawh uluk taka ngaihtuah tel thin a ni, a ti a. Kawng lian laih avanga harsatna dang thleng thinte chu a tul ang zela
bawhzui thin a ni, a ti bawk.
PIU PWD Sr. AE Hmingthanmawia chuan, World Bank Project duhdan angin kawng laih leivung ten huan thlai a tihchhiat loh nan fel fai taka paih vek tura hmalak thin a ni a. Champhai leh Zokhawthar inkar kawngpui World Bank Road laih nan hmun 5 ah PIU in leivung paihna tur a ruat a ni, a ti a. Ram neitu leh Contractor ten inbiakremna an neih theih thu sawiin, PIU in a pawm chin leivung paihna baka Contractor-in a paih avanga harsatna awmte chu ram neitu leh Contractor inkar niin, leivung paih vanga complaint tam zawkte chu hetiang hi a nih thu a sawi bawk.
Nimin thutkhawmah hian Champhai leh Zokhawthar inkar kawngpui, World Bank Road kawng laih avanga harsatna tuarte hnen atanga lungawilohna an neihte DC Office Champhaia thehluh 26 leh PIU a thehluh 1 chungchangte ngaihtuah a ni a. Lungawilohna thlente hi mimal hmingin 19, VC 5, Kohhran 1, Co-operative Society 1 leh NGO atanga 1 a ni.
Leivung paihin a tihchhiat huan lo ram leh tuikawngte bakah kawng laih avanga leiminin harsatna a thlente PIU hotuten kalchilhin zirchiang se, zirchianna chu September ni 10, 2021 ral hmain Chairman, District Bawrhsap hnenah thehlut se tih a ni.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More