Khawchhak tlangdungin Kawlphetha khaihlak lova a dawn theihna tura 132 kV Line thlun belh mek chu Khawzawl thlengin hrui pawh thlen tawh a ni.
Khawchhak tlangdung Khawzawl leh Champhai District-in Kawlphetha a lakna, Zuangtui atanga 132 kV Line a chhiat leh khaihlak changa Serchhip leh East Lungdar lam atanga 132 kV line dang thlun belh mek chu niminpiah atang khan hna thawh tan leh a ni a. 132 kV line hi Khawzawl thlengin a hrui pawh thlen tawh a ni a, Khawzawl Hermon vengah a hrui kal danah mipui tana him lo thei a awm avangin mipui tana him zawk turin a ban phun sawn a ni a, hrui thlun hna hi tunkar chhungin zawh fel hman beisei a nih thu P&E SDO F.Lalzamvela chuan a sawi a. P&E EE J.Lalhmachhuana chuan Khawzawl leh Champhai inkara hrui pawhna turte erawhchu endik tawh chin bak chu hmalakna a la awm rih lo tih a sawi.
Khawchhak tlang dungin Kawlphetha a chawk luhna Zuangtui 132 kV line a khaihlak changin Serchhip to Khawzawl via East Lungdar 33 kV level in electric current lak thin a ni a.
132 kV line, Serchhip leh East Lungdar hi thlun zawh fel a nih chuan Khawchhak tlangdungin 132 kV line hi thuang hnihin a nei tawh dawn a, line pakhat chhiat avanga harsatna awm thin te a sutkian theih beisei a ni.
Electric hrui thlun hna thawh a nih avang hian 33kV Sub-station-in a chawmte’n chhun lamah kawlphetha an dawng mumal thei dawn lo va,
Khawchhang tlang dungin Kawlphetha tha zawk a dawn theihna tur a nih avangin P&E hotute chuan mipui hriatthiamna an ngen.
Comments are closed.