MELBUK RAWLTHAR TE THIAM BER

Kum 14 hnuai lam football hmanga inelna K.Thangdailova Memorial Football Tournament final chu nimin khan khelh zawh a ni a, si khat faia Vengthlang FC hnehin Melbuk GSA an champion.
Final khelh hma hian kharna hun buatsaih niin, CDFA President C.Hualrikhuma’n a kaihruai a. Champhai DFO Lalduhthlana’n khuallian niin a hmanpui a. Khuallian Lalduhthlana, DFO chuan, naupangte tan inelna buatsaihtu Champhai District Football Association leh Tournament sponsor tu K.Thangdailova fate chu fakawm a tih thu sawi a. Mizo inkhel thiamte pho chhuak thintu District FA leh MFA hruaitute hmalakna chu Football-a Mizoram hmingthat chhan a nih thu a sawi bawk.
Infiammite chu taima tura chahin, eizawnna tur leh puitlinpui tura hmalak dan a in an vek loh avangin mi taima tan lo chuan dinchhuah theih a ni lo, a ti a. Vawi hnih khat hlawhchhama beidawng mai lo tura fuihin, hlawhchhamna inhneh tir ngai lote hi a dingchhuak an ni thin a. A thiam ber berte hi an hlawhtling vek lo va, mi taima leh tumruh, a bei fat fattute hi a tawpa hnehna changtute an ni thin, a ti bawk. Tawrhchhel pawimawh thu sawiin, hlawhtling tura harsatna chi hrang hrang paltlang tur chuan tawrhchhel hi thil pawimawh tak a ni, a ti a; infiammite chu ruihhlo leh taksa tichhe thei thildang laka insum tlat turin a chah bawk.
Final-ah hian Melbuk GSA leh Vengthlang FC an inkhel a, Melbuk GSA hi Si 1 faiin an chak a, Melbuk Champion-na goal hlu tak hi Lalrohlupuia, Melbuk-in Minute 30-naah Champion nihna leh inkhelh a Goal awmchhun chu a khung a ni. Champion Team Melbuk GSA hian Trophy leh ₹ Sing 1 an dawng a, Pahnihna Vengthlang FC-in Trophy leh ₹ Sang 5 an dawng bawk. Best Player-ah Liansiama, Melbuk thlan a ni a. Goal 6 khungtu Lalchhandama, Vengthlang FC chu Top Scorer a ni a, Melbuk FC hian Fair Play award an dawng bawk a ni.