East Tuipui Bialtu MLA Ramthanmawia chuan a bial chhung a tlawhnaah, hmasawnna hna thawktute chu tha taka thawk tur leh thawk tha lote chu hna thawh tur pek nawn an tum loh thu a sawi.
Bial mipuite’n harsatna hrang hrang an neihte thlen tura Aizawl kal kher ngai lo turin East Tuipui Bialtu MLA, Ramthanmawia chu Ningani khan Khawbung-ah a riak lut a. Ningani tlai khan Khawbung khawtlang hruaitu leh party hruaitute kawmin, party bik sawi loin mi rethei dawmkan ngai dawmkan chu a tum ber a nih thu a sawi a.
Hemi hnu hian Khawbung WATSAN Sub-Division Office leh Khawbung BDO Office a tlawh leh a; an hmalakna hrang hrangte chu fakawm a tih thu sawiin, theihtawpa hna thawk zel turin a chah a. An hmalaknaa harsatna an neih ang angah puih theihna a neih chuan pui tura a inpeih reng thu a hrilh bawk.
Ramthanmawia hian nimin zing khan Khawbunga Rs. Nuai 104 senga sak tur – Supply Kudam leh Quarters sak hna thawh mek chu a hmunah a enfiah a. Chhun lamah Gov’t Khuangthing Middle School class-room sak belh mek leh, Tuipuiral Sports Meet thlenna tur Khuangthing khelmual chei that dan turte a hmunah kalin a enfiah bawk.
Rs. Nuai 2,690 senga laih tlang tawh Khuangthing leh Thekte inkar kawng, kilometer 29.91-a thui chu PWD hotute nen an enfiah nghal a. Nimin vek khan MLA fund hmanga Thektea Upper Primary School Building chhia thawmthat chu a hmunah a enfiah a. Thekte leh Thekpui Branch YMA kutah Oxygen Concentrator bur 1 ve ve a pe bawk.
Comments are closed.