MI THILPHAL ZARAH CHAMPHAI IN CT SCAN NEI

Get real time updates directly on you device, subscribe now.

Nimin khan Dr. R Lianmawia, Chief Medical Officer Champhai chuan Champhaia a hmasa ber ni turin Med Aim Hospital-a CT Scan khawl a hawng.
CT Scan hawnna hun hi H.Ramchullova, Med Aim Hospital Managing Director-in a kaihruai a, Rev. Pastor Zosangkima Tlau, Champhai Adventist Eastern Circle-in Pathian hnenah a hlan a; CMO Dr R Lianmawia’n a hawng a; CT Scan khawl hi Rothuamluaia te chhungkua-in an invest niin Champhaia a hmasa ber ni turin Med Aim Hospital-ah hman theiha peihfel a ni a.
Pathianni leh Inrinni tel lovin nitin chawhma dar 10:00 atanga Chawhnu dar 1:00 inkarah khawl hi hman theih a ni ang. Mipui tana hman theih tura Khawl hawngtu Champhai CMO Dr R.Lianmawia chuan Mizoram chhunga sawrkar damdawi In 3 chiaha la awm CT Scan hi Champhai District Hospital-a awm turin beiseina a san loh em em lai a, mi thilphal leh remhriate zara Champhaia hman theiha a awm chu ropui a tih thu sawiin, Champhai leh a chhehvel bakah khawchhak lama Zohnahthlak CT Scan mamawh te’n Aizawl leh phai pan buai kher ngai tawh lo a, Champhaia CT scan khawl hman theiha a awm ta chu hmasawnna mel lung pawimawh tak a ni, a ti.
CMO chuan, Investor leh Hospital enkawltute chungah Champhai mipui te’n lawmthu kan sawi mawlh mawlh a ni, a ti a. Damlo te an dam theihna tur chuan an natna hriat chhuah a ngai a, chutianga an natna chhante hriat chhuah zung zung a nih theihna
tura pawimawh tak, CT Scan Champhaia a awm tawh avangin mi tam takin damna an chan a besei thu sawiin, Med Aim Hospital chu an kal leh zelna turah duhsakna a hlan a ni.
He hunah hian Investor aiawhin VL Ramdina’n thu a sawi a, H.Ramchullova hnen atangin technical report ngaihthlak a ni a. C.Lalremliana, Med Aim Welfare Society Board Member-in lawmthu sawiin hun a khar a ni.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More