Nungchate humhalhna hapta vawi 68-na, ‘National Wildlife Week, 2022’, October ni 2 atanga ni 8, 2022 chhunga hman tur chu Champhai Forest Division buatsaihin nimin chawhma dar 11:30 khan Govt. Gandhi Memorial High School, Champhaiah hawn a ni.
He hunah hian inzirtirna hrang hrang buatsaih a ni a. Pu Lalduhthlana, DFO Champhaiin ‘Faina, Nungcha humhalhna dan leh a kaihhnawih’ tih thupui hmangin zirtirna a pe a. Zirlai kalkhawmte chu nungchate humhalh kawnga pen chhuaka dan leh hraite ngaipawimawha midangte zirtirtu ni turin a chah a. Faina kawnga theihtawp chhuah tur leh environment humhalh leh vawnfai kawnga hma la tu ni turin a sawm a ni.
Pu Lalhlupuia, Honorary Wildlife Warden, Champhai District chuan ‘Sik leh sa inthlak danglamin nungchate a nghawng dan’ tih thupui hmangin zirtirna a pe a. Sik leh sa inthlak danglam nasa lutuk chu mithiamte rilru tihahtu ber a nih thu a sawi a. Nungchate leh mihringte inrintawn dante tarlangin, sik leh sa inthlak avanga nghawng thalo thlengte a sawifiah a. Kalkhawmte chu ramngaw leh nungchate humhalh duhna rilru pu thara mahni theihna zawn theuha hma la turin a sawm a ni.
He hunah hian District Level Narco Coordination Centre (NCORD) ruahmannain Pu Lalrinpuia Varte, SP & Chairman, District Wildlife Crime Control Sub-Unit, Champhai chuan ‘Ruihhlo tawlh leh hman sual’ tih thupui hmangin zirtirna a pe a. Zirlaite chu rilru leh ngaihtuahna thang mek an ni tih hrilhin, ruihhlo leh a kaihhnawih laka fihlim turte, a tih pawh tichhin lo turtein a fuih a. Nawmna leh hlimna um vangte, manganna leh hreawmna chhawk zangkhai tum vangte leh tih chhin ve chak hrim hrim avanga ruihhlo khawih chuan ngawlveinaah a hruai thlen thin thu a sawi a. Ruihhlo tawlh man a nih dante leh a tawlh, kawl leh zuar mante laka hremna lekkawh theih hrang hrangte a tarlang a. Ruihhloin nghawng thalo a thlen hrang hrangte a tarlang bawk.
He hun hi Pu HT. Vanlalsawma, Headmaster, Govt. Gandhi Memorial High School chuan a kaihruai a. Pu Jonathan Lalhruaitluanga, RO Champhaiin lawmthu sawiin hun a khar a ni.
National Wildlife Week hi kum 1952 atanga hman tan a ni a. National Wildlife Week kaltlang hian nungchate humhalh leh ngaihhlutna thar rirlua tuhte, abikin nungcha dinhmun derthawnga awmte an rem mai loh nana hmalak tulnate leh hmalak dante inzirtir thin a ni.
Comments are closed.