MIDDLE SCHOOL LEH HIGH SCHOOL TAN CHILDREN’S SCIENCE CONGRESS

Get real time updates directly on you device, subscribe now.

Samagra Shiksha, Champhai District leh Science Teachers Association Mizoram (STAM) tangkawp bultumin nimin khan Education Training Hall, Champhaiah ‘Understanding Ecosystem for Health and Well-being’ tih thupui hmangin District Level Children’s Science Congress, Middle School leh High School zirlaite tan buatsaih a ni. He hun hi District Bawrhsap Pu James Lalrinchhana, District Education Committee Chairman ni bawk chuan hmanpuiin District Level Children’s Science Congress chu a hawng a ni.
Khuallian Pu James Lalrinchhana chuan Science chawisanna kawnga hmalakna pawimawh tak Samagra Shiksha leh STAM te buatsaih Children’s Science Congress chu ngaihhlutawm a tih thu sawiin, naupang rilru thang chak kum 10-17 inkarte tana chet chhuah theihna hun leh hmun remchang hawn a ni chuan Science lama tuihalna leh rilru thang mekte mamawh a phuhruk sak thin a ni, a ti a. Children Science Congress chuan Science hmuh dan a thlak hlawk a, thangtharte Science-ah tuihalna a pe a, nitin khawsak phunga changkanna leh hmasawn nana mamawh tute dapchhuah kawngah tanlakna thar a siam phah a ni, a ti a. Science behchhan finfiahna hmangin puithunaatthlak tak tak khawtlang nun nghawng thinte kan kalsan a ngai a, Science chuan a tha zawngin khawtlangah thil thar leh inthlak a awm tir thei a ni, a ti a. Science hmangin chenna leh avelte kan ti hriselin kan ti thianghlim thei a, kan vela chengte nena inrintawnna ecosystem mumal leh tha vawnhim zel kawngah awmzia a nei thui hle a ni, a ti bawk.
Intihsiaknaa tel Children Scientist-te chu inringtawk tak, chapo si lo leh zak lova an hmabakte hlen tum turin a chah a. Children’s Science Congress kaltlangin khawtlang harsatna engemaw ber tih ziaawm a nih ngei theih nana ngaihtuahna seng tur leh, thil thar chhawrnahawm tak hmuhchhuah nana hman tum turin a chah a. Zirlaite chu thil chîka teh thiam tum tur te, khaikhin leh thliar hran thiam bakah ngaihruat thiamna leh sawifiah thiamna ngaipawimawh turtein a chah a. Ngaihtuahna zau tak neia thil thar leh ngaihhlutawm siam tura tan la turte leh hnathawhhona tha siam tum turin a fuih a. Mithiam zawkte thurawnte ngaipawimawha intuaihriam nana hmang zel turin a chah bawk a. Ngaihtuahna leh thiamna tipung turte, nun tinuama tihchangtlungtu bakah hriselna kawnga pawimawh tur Science project tha tak, Champhai District atanga a chhuah ngei theih nana tang tura duhsakna hlanin Children’s Science Congress Champhai chu a hawng a ni.
Hawnna hun hi Pu H.Darhmingliana, Deputy District Coordinator, Samagra Shiksha, Champhai District chuan kaihruaiin, Pu Nelson Khiangte, District Academic Coordinator Champhai hnen atangin report ngaihthlak a ni a. He hunah hian Champhai khawpui chhung atangin School 10 an tel a, project 14 hmangin Children Scientist te’n presentation an pe a ni.
District Level Children’s Science Congress kharna hun chu nimin chawhnu khan Pu C.Lalrongura, District Coordinator kaihhruaiin hman a ni a. He hunah hian endikna neia thurawnte pe tura ruat Dr. Zothansangi, Asst. Professor (Zoology), Govt. Champhai College; Pi Rosangzuali Varte, Asst. Professor (Botany), Govt. Champhai College leh Dr. Lalnunzira, Lecturer, DIET Champhai te’n zirlaite hnenah Science chungchang leh presentation neih kawnga hmasawnna tur thurawnte an pe a ni.
School 10 atanga project 14 entir atangin class VII zirlai Lalnunhlima leh Zopuii, BC Lalthlamuana English Academy te pakhatna an ni a, class X zirlai Valeric JH Lalchhanhimi leh Lalrinawmi, Govt. Ruantlang HS te chu pahnihna niin, pathumna dinhmun hauhtu pahnih an awm a; class VIII zirlai Lalmuankimi leh Vanlalremruati, Holy Mission School, class IX zirlai T.Lalawmpuii leh Ruthi Lalbiaknungi, Bethel Mission School te an ni a, State Level Children’s Science Congress-ah District aiawhin an tel dawn a ni.
Pi Lalhruaitluangi, SDEO Champhaiin zirlaite hnenah chawimawina thuziak cheimawi a hlan a. Pu H.Lalhminghlua, Addl. District Coordinator, Samagra Shiksha-in lawmthu sawiin hun a khar a ni.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More