MIHRING HRISELNA LEH THEIHNA HAICHHUAK TURIN INFIAMNA HMUNHMA THAWM THAT ZEL TUM

Get real time updates directly on you device, subscribe now.

Rural Development Minister Pu Lalruatkima chuan nimin chawhnu khan Ministry of DoNER hnuai Non-Lapsable Central Pool of Resources (NLCPR) kaltlanga RD Department Mizoramin project lian a kalpui hmasak ber, cheng nuai zathum sawmruk pakua singriat leh sangkua (Rs 369.89 lakh) senga sak Khawbung Mini Sports Complex chu a hawng. RD Minister hi East Tuipui bialtu MLA Pu Ramthanmawia, Bamboo Link Road Board Vice Chairman chuan a tawiawm a ni.
Khawbung Mini Sports Complex hawngtu RD Minister Pu Lalruatkima chuan hrileng avanga kum 2 dawn hun harsa tawn a nih hnua Khawbung Mini Sports Complex hawn theiha peihfel a ni thei chu lawmawm a tih thu sawiin, thahnemngai taka thawktu Contractor Pu C. Lalnuntluanga tel lova hawn a ni erawh khingbai a tih thu a sawi a. NLCPR kaltlangin Aibawk, East Lungdar leh Khawbungahte Mini Sports Complex sak hna kalpui a nih thu a sawi a. Mihringte hriselna leh theihnate hailang thei turin infiamna hmunhmate thawmtha chung zela hmalak thin a nih thu sawiin, pipu sulhnu tamna leh infiamna huanga mi hmingthate tamna East Tuipui biala infiamna hmunhma changtlung tak din a ni chu a lawmpui thu a sawi a. Eco-tourism a theihna nasa tak nei Tuipuiralah mikhual dawnsawng dan thiam a tul thu leh ei bar dehchhuah kawnga hmasawnna rahbi pawimawh tak a ni tih hriaa chawisan nachang hre theuh se a duh thu a sawi bawk.
Infiamna hmunhma tha tak an neih thar chu thalaiten chhawr tangkai ngei se a duh thu sawiin, an thiamnate tipung tura chhawr tangkai thiam turin a fuih a. Sports policy tha tak sawrkain a duan thu pawh tarlangin, infiammite tan hamthatna tam tak a awm a, an tan kawl a eng a ni, a ti a. A tha lam kawng zawh leh inchophur tawn chung sela hmalak a tul thu sawiin, kan intihphur tawn phawt chuan hma kan sawn ngei dawn a ni, a ti a. Sports Minister nen an inrawn hnuah External Aided Project (EAP) kaltlanga Khawbung Mini Sports Complex-ah Artificial grass phah tura hmalak tum a nih thu leh TATA Trust Football Academy dah tum a nih thu a sawi a. Football Academy atangin inthununna leh aia upate zahna zir a ni tel dawn a, chu chuan khawtlangah inlungrualna leh thuawihna a thlen ngei a beisei thu a sawi bawk a. Mini Sports Complex enkawl leh cheihnum kawngah khawtlang mipuite an pawimawh dawn thu sawiin, Sawrkarin an tana hmasawnna ruhrel hrang hrang a chhawpchhuah sakte chu neitu thinlung pua enkawl tur leh theihtawp chhuaha sawrkar tawiawm zel turin mipuite a sawm nghal a ni.
Thusawitu dang Pu Ramthanmawia, Bamboo Link Road Board Vice Chairman chuan a bial chhungah sawrkar hmasa atang tawha ruahmanna felfai tak siama infiamna project lian tak duan a ni chu lawmawm tiin, thahnemngai taka tha thawhtu zawng zawngte chungah leh Contractor-te chungah lawmthu a sawi a. Hmabak la awm angte hotute nen enzui zel a nih tur thu a sawi bawk a. A bial chhung hmasawnna ruhrel hrang hrang siamte a tahtawla hawn zel tum a nih thu leh hmasawnna dangte pawh siam tuma hmalak chhunzawm mek zel a nih thu sawiin, sawrkar chungah bialtu a nih angin lawmthu a sawi nghal bawk a ni.
He hun hi Pu. R. Lalthazuala, Director, Rural Development Department chuan a kaihhruai a. Pu A. Chhalai, Executive Engineer, RD Deptt. hnen atangin technical report ngaihthlak a ni a. Pu K. Lalhlimpuia, BDO Khawbung RD Block in lawmthu sawiin hun a khar a ni.
Minister hi a enkawl RD Department, Revenue Department leh I&PR Department Official ten an tawiawm a ni.
Khawbung Mini Sport Complex hi NLCPR hnuaiah kum 2017 January ni 4 atanga thawh tan niin kum 2020 July ni 14 khan zawh fel a ni a. Covid -19 hri leng vel avangin hawn theih mai a ni ta lo a, hun rei tak boruak ziaawm hun ngaihchan a nih hnuin vawiin khan hawn a ni ta a ni. Advance Consultancy, Republic Veng, Aizawl chu he hna thawktu atana thlan Contractor an ni.
Khawbung Mini Sports Complex hian Works Component hrang hrang 12 a keng tel a. Heng zingah hian Football Pitch, a dung metre 105 leh avang metre 68, S/M Gallery kengtel Basketball Court, a dung metre 29 leh a vang metre 16, S/M Gallery kengtel Volleyball Court, a dung metre 24 leh avang metre 20 te a awm a. RCC Gallery 3 leh PCC Galery 1, RCC Pavilion cum Dressing Room, Mizo pa chhiara chhawng hnih a awm tel bawk a. Heng bakah hian Mini Sports Complex panna kawng 2 siam tel a ni bawk.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More